काठमाडौँ । नेपालले एसीसी यू–१६ इस्ट जोन कपको फाइनलमा स्थान बनाएको छ ।
आज भएको सेमिफाइनल खेलमा आयोजक मलेसियालाई ९ विकेटले हराउँदै नेपाल फाइनलमा पुगेको हो ।
मलेसियाले दिएको ९१ रनको लक्ष्य नेपालले ११.४ ओभरमै भेट्टायो । नेपालका ओपनर परिमार्जन यादवले ३५ बलमा ५९ रनको विष्फोटक इनिङ खेले । यस्तै, शिवान्स बजगाईं २३ रनका अविजित रहे ।
त्यसअघि टस हारेर पहिला ब्याटिङ गरेको मलेसिया ४३ ओभर १ बलमा ९० रनमा अलआउट भयो । मलेसियाका मुहम्मद फातुल मुइनले ३८ रन बनाए । तर, अन्य ब्याट्सम्यानले उल्लेख्य रन जोड्न सकेनन् ।
बलिङमा नेपालका अभय यादवले सर्वाधिक ४ विकेट लिए । यस्तै, शुभम खनालले ३ तथा कप्तान विपीन शर्मा र सचिव भट्टले एक–एक विकेट लिए ।
नेपालले अब उपाधिका लागि हङकङ र सिंगापुरबीचको विजेतासँग खेल्नेछ । फाइनल खेल शनिबार हुनेछ ।
