काठमाडौं । नेकपा एमालेभित्र बहस चर्किरहेका बेला पूर्वराष्ट्रपति विद्यादेवी भण्डारीले आज सक्रिय राजनीतिमा फर्कने बाटो खोज्दै हुनुहुन्छ ।
अध्यक्ष केपी शर्मा ओलीको चाहनाविपरीत राजनीतिमा फर्किंदा अप्ठ्यारो हुनसक्ने भन्दै उहाँले एमालेको मूल नेतृत्व र अन्य नेतृत्वसँग सहकार्य गर्ने बाटोबाटै अघि बढ्न खोज्नुभएको छ ।
एमालेका नेताहरुका अनुसार उहाँ आजैदेखि सक्रिय राजनीतिमा फर्कनुहुने छ ।
काठमाडौंको राष्ट्रिय सभागृहमा आज हुने मदन भण्डारी फाउन्डेशनको कार्यक्रमबाट पूर्वराष्ट्रपति भण्डारीले राजनीतिमा फर्किएको घोषणा गर्न लाग्नुभएको हो ।
७४ औं मदन जयन्तीको अवसरमा आयोजना हुने कार्यक्रमको प्रमुख अतिथी प्रधानमन्त्री ओलीलाई बनाइएको छ । ओली आजै स्पेन भ्रमणमा जाने कार्यक्रमसमेत छ । दिउँसो मदन भण्डारी फाउण्डेशनको कार्यक्रमलाई सम्बोधन गरेर साँझ ६ बजे प्रधानमन्त्री स्पेन प्रस्थान गर्ने कार्यक्रम रहेको सचिवालयले जनाएको छ ।
अनेरास्ववियुको महाधिवेशन उद्घाटन समारोहमा पूर्वराष्ट्रपति भण्डारी सक्रिय हुन लागेको चर्चालाई सन्दर्भ बनाएर कडा भाषण गरेका अध्यक्ष तथा प्रधानमन्त्री ओलीले आज गर्ने सम्बोधनले प्रष्ट संकेत गर्ने नेताहरुको भनाइ छ । यो कार्यक्रमको आयोजनाकै सन्दर्भमा पनि लामो छलफल र रस्साकस्सी भएको बताइन्छ ।
दुई कार्यकाल राष्ट्रपतिमा रहेर शीतल निवासबाट बिदाइ भइसकेकी भण्डारीले एमाले अध्यक्ष ओली प्रमुख अतिथि रहने फाउन्डेशनको कार्यक्रमबाट राजनीतिकमा फर्किएको सन्देश दिन खोज्नुभएको हो ।
भण्डारी राष्ट्रपतिबाट बिदा भएपछि कोशी, लुम्बिनी र कर्णाली प्रदेशको भ्रमण गरेर फर्किसक्नुभएको छ । उहाँ यसबीचमा उत्तरी छिमेकी चीनकोसमेत भ्रमण गरेर आइसक्नुभएको छ ।
भण्डारीलाई चिनियाँ नेताहरूले नेपालका कम्युनिष्ट दलहरू मिलाएर तिनको नेतृत्व गर्न शुभेच्छा दिएर पठाएको बताइएको छ ।
एमालेमा फर्किनका लागि उहाँले अध्यक्ष केपी शर्मा ओलीसँग पटक–पटक संवाद पनि गरिसक्नुभएको छ । पछिल्लो पटक केही दिनअघि भण्डारीले बालुवाटार नै पुगेर ओलीसँग गरेको संवादलाई अर्थपूर्ण मानिएको छ । यो संवादलाई भण्डारी एमालेमा फर्किने एउटा बिन्दुका रुपमा नेताहरुले ब्याख्या गरिरहेका छन् ।
मदन भण्डारी फाउन्डेशनले आज गर्ने कार्यक्रममा पूर्वराष्ट्रपति भण्डारी विशेष अतिथिका रुपमा जानुहुने छ । त्यहीँबाट उहाँले एमालेको राजनीतिमा फर्किने सन्देश दिन लाग्नुभएको हो ।
भण्डारी एमालेको राजनीतिमा फर्किएमा पार्टीबाट बाहिरिएका नेताहरू पनि फर्किन सक्ने अनुमान गरिँदैछ । माधवकुमार नेपाल, भीम रावल र वामदेव गौतमसहितका नेताहरूका लागि एमालेमा फर्किन पनि भण्डारी चाहिने वकालत एउटा पक्षले गरिरहेको छ ।
आगामी भदौ २० देखि २२ गतेसम्म ललितपुरको गोदावरीमा दोस्रो विधान महाधिवेशन हुँदैछ । उक्त महाधिवेशनमा ७० वर्षे उमेर हदको विषय पेचिलो बनेको छ । त्यही महाधिवेशनलाई लक्षित गर्दै भण्डारीले एमालेमा औपचारिक रुपमै सक्रियता बढाउन खोज्नुभएको हो ।
७४ वर्ष लागिसकेका ओली हाल निलम्बनमा रहेको ७० वर्षे उमेर हद हटाउने पक्षमा हुनुहुन्छ । तर भण्डारी ७० वर्षे कायमै राखेर ओलीलाई बिदा गर्ने पक्षमा देखिनुभएको छ ।
