भक्तपुर । भक्तपुर क्यान्सर अस्पतालमा उपचारत्त एक बालिकामा कोरोना पुष्टि भएसंगै अस्पतालको एनएक्स वार्ड शिल गरिएको छ ।
शनिबार राति काभ्रेकी १२ वर्षीया बालिकामा कोरोना संक्रमण पुष्टि भएपछि एनएक्स वार्ड शिल गरिएको हो ।
अस्पताल प्रशासनका अनुसार काठमाडौंको बीर अस्पतालबाट मस्तिष्कसम्बन्धि रोगको शल्यक्रियाका लागि रेफर गरिएकी बालिकाको शल्यक्रिया पूर्व गरिएको पिसिआर रिपोर्टमा कोरोना पोजेटिभ आएको स्वास्थ्य कार्यालय भक्तपुरका प्रमुख कृष्ण मिजारले जानकारी दिए ।
उनलाई थप उपचारका लागि शनिबार राति नै त्रिवि शिक्षण अस्पताल महाराजगञ्ज लगिएको उनले बताए ।
बालिकाको उपचारमा संलग्न अस्पतालका १२ जना नर्स, ५ जना डाक्टर, एनएक्स वार्डमा रहेका १३ जना बिरामी र १३ कुरुवा सबैलाई अस्पतालकै क्वारेन्टाइनमा राखिएको अस्पतालका प्रशासन प्रमुख राजाराम तजलेले जानकारी दिए ।
अस्पतालको क्वारेन्टाइनमा रहेका सबैको स्वाब संकलन गरिसकेको समेत तजलेले जानकारी दिए ।
उनका अनुसार अस्पतालका अन्य सेवाहरु भने सुचारु रहेको छ ।
यसैगरी, शनिबार नै मध्यपुर थिमि नगरपालिका–९, बोडे निलबाराहीकी ४ वर्षीया बालिकामा पनि कोरोना संक्रमण पुष्टि भएको थियो । उनलाई थप उपचारका लागि त्रिवि शिक्षण अस्पताल महाराजगञ्ज लगिएको स्वास्थ्य कार्यालयका प्रमुख मिजारले जानकारी दिए ।
