नेपाली काँग्रेसका सांसद डाक्टर प्रकाशशरण महतले राष्ट्रिय स्वतन्त्र पार्टीका सांसदहरु बजेटका तमाम विषयको छलफलमा सहभागी नभएर एउटा महत्वपूर्ण अवसर गुमाएको बताउनुभएको छ ।
आईतवार प्रतिनिधिसभा बैठकमा राजश्व र व्ययको वार्षिक अनुमानमाथिको सैद्धान्तिक छलफलमा भाग लिँदै सांसद डा. महतले बजेट वर्षमा एकपटक आउने र बजेटको तमाम विषय चिरफार गर्नुपर्ने समयमा आन्दोलन गरेर उक्त अवसर गुमाएको बताउनु भयो ।
उहाँले कुनैपनि आधार नै नभएको विषयलाई लिएर छलफलमा भाग नलिनु जनप्रतिनिधिको हैसियतले जनतालाई नै गुमराहमा राख्नु सरह भएको आरोप लगाउनु भयो । विरोधकाबीच पनि प्रमुख प्रतिपक्षी दलले सक्रिय सहभागिता जनाउनु खुशीको विषय भएको बताउँदै उहाँले मुलुकको वित्त व्यवस्थापनका कुराहरु बजेटले बोल्ने भएकाले तथ्यहीन विषयमा आन्दोलन गरिरहनुको कुनै औचित्य नभएको टिप्पणी गर्नुभयो ।
डाक्टर महत भन्नुहुन्छ, ‘दुर्भाग्य हो कि यो छलफलमा निर्धारित समय जुन तोकिएको थियो त्यो दिनदेखि नै छलफल अगाडि बढ्नु पथ्र्यो । विपक्षीमा रहेका दलहरुसँग निरन्तर छलफल पनि सरकारले ग¥यो र तत्पश्चात माओवादीलगायतका दलहरुले यो प्रक्रियामा सहभागी हुनुभएको छ । तर, रास्वापाका साथीहरुले पनि यो बहसमा सहभागी भएर गम्भीर छलफल गर्नुपथ्र्यो । बजेट बर्षमा एक पटक आउँछ । त्यो बजेटको तमाम विषयमा चिरफार गर्ने त्यसका कमजोरी, राम्रो पक्ष सबै पक्षमा छलफल गर्ने एउटा महत्वपूर्ण अवसर उहाँहरुले गुमाउनुभएको छ । मलाई दुःख लागेको छ कि यस्तो महत्वपूर्ण विषयमा छलफलमा भाग नलिएर जुन विषय उहाँहरुले उठाउनु हुँदैछ त्यसमा कुनै आधार नै छैन । कुनैपनि आधार नभएको विषयलाईै लिएर यो छलफललाई अवरोध गर्नु, छलफलमा भाग नलिनु वास्तवमा जनप्रतिनिधिको हैसियतले जनतालाई नै गुमाराहमा राख्नु हो भन्ने मलाई लाग्छ । जे भएपनि यो छलफल अगाडि बढेको छ र जिम्मेवारीपूर्वक यस विषयलाई उठाउँदै आउनुभएका अन्य दलहरु प्रमुख विपक्षीले सक्रिय सहभागिता जनाएको छ । यो खुशीको कुरा हो । जहाँसम्म बजेटको कुरा छ यो बजेट वास्तवमा हरेक बजेटको लक्ष्य हुन्छ ।’
‘देशमा आर्थिक समृद्धि सिर्जना गर्नु, आर्थिक अवसरहरु सिर्जना गर्नु, रोजगारी सिर्जना गर्नु, देशको आर्थिक बृद्धिलाई गति दिनु । त्यो गर्नका लागि राज्यको साधनस्रोत कसरी परिचालन गर्ने विदेशी सहयोग कसरी लिने? र आन्तरिक राजश्व कसरी परिचालन गर्ने त्यसको आधारमा राजश्वको एउटा अनुमान गरिन्छ । त्यसको आधारमा राजश्व अनुमान प्रस्ताव गरिन्छ र त्यही प्रस्ताव वमोजिम कसरी विनियोजन गर्ने ? कुन क्षेत्रमा लगानी गर्ने ? पूँजीगत खर्च कहाँ कहाँ गर्ने । पूँजीगत खर्चमा पनि कसरी प्राथमिकता दिने ? बजेटले हाम्रो सामान्य खर्च तलब भत्ताको कुरा, सामाजिक सुरक्षाका कुरा, वित्त व्यवस्थापनका कुरालाई व्यवस्थापन गर्ने विषयमा बजेटले बोल्छ । र यो बजेटले पनि त्यही काम गरेको छ । यो बजेटले बजेट विनियोजनमा अराजकता, अनुशासनहीनता, विनियोजन धेरै गर्ने र परिणाम प्राप्त नहुने परिस्थितिको कमीमा यसले काम गरेको छ । संघीय बजेटले ३ करोडभन्दा तलको आयोजना नगर्ने विषय कार्यान्वयनमा अर्थमन्त्री हुनुपर्नेजति शसक्त हुन सक्नुभएन । अर्थमन्त्रीले चार हजारभन्दा बढी आयोजनाहरु कटौती गर्नुभएको छ । बजेटलाई परिणाममुखी बनाउने कोशिस गर्नुभएको छ त्यसको सराहना गर्न चाहन्छु । अहिलेको आवश्यकता भनेको परिणामुखी बजेट नै हो ।
उहाँले परिणाममुखी बजेटको आवश्यकतालाई ध्यान दिँदै अर्थमन्त्रीले आर्थिक वर्ष २०८२/८३ को बजेटलाई परिणामुखी बनाउने कोसिस गर्नुभएको बताउनु भयो ।
