काठमाडौं । काठमाडौं महानगरपालिकाका मेयर बालेन्द्र शाह र उपमेयर सुनिता डंगोल बीच भेटवार्ता भएको छ ।
बुधबार उपमेयर सुनीता र तीन वडाअध्यक्षसँग बालेनले गोप्य छलफल गरेका हुन् । छलफलमा कार्यपालिका बैठक र नगरसभा बोलाउने सहमती भएको छ ।
छलफलमा महानगरका प्रवक्तासमेत रहेका कांग्रेसबाट निर्वाचित १७ नम्बर वडाका वडाध्यक्ष नवीन मानन्धर एमालेबाट निर्वाचित ३२ नम्बरका वडाध्यक्ष नवराज पराजुली र नेकपा एसबाट निर्वाचित १५ नम्बरका वडाध्यक्ष ईश्वरमान डंगोलको सहभागिता रहेको स्रोतले जनायो ।
बैठकमा बालेनले मिलेर अगाडि बढ्ने र चाँडै कार्यपालिका बैठक र नगरसभा बोलाउन सहमत भएको एक सहभागीले बताए ।
काठमाडौं महानगर कार्यपालिकाको बैठक अन्तिम पटक पुस १४ गते बसेको थियो । त्यसपछि प्रमुख प्रशासकीय अधिकृत सरोज गुरागाईंको विषयमा विवाद भएपछि मेयर बालेनले बैठक बोलाएका थिएनन् ।
