बैतडी। उद्योग वाणिज्य तथा आपूर्तिमन्त्री दामोदर भण्डारीले कार्यालय प्रमुखहरूलाई तोकिएको समयमा आयोजना सम्पन्न गर्न निर्देशन दिनुभएको छ ।
आज बैतडीको पाटनमा जिल्लाका विभिन्न कार्यालय प्रमुखसँगको छलफलमा उहाँले राज्यबाट विनियोजित आयोजना कार्यान्वयनमा ढिलाइ भइरहेको भन्दै यथाशीघ्र कार्यान्वयनमा जोड दिन आग्रह गर्नुभयो ।
आर्थिक वर्षको अन्त्यमा मात्र काम गर्ने प्रवृत्ति दोहोर्याउने काम भइरहेको भन्दै मन्त्री भण्डारीले आयोजना कार्यान्वयन र सम्पन्न निर्धारित समयभित्र गर्नुपर्नेमा जोड दिनुभयो । चालु आर्थिक वर्षको ११ महिनामा जिल्लाका कार्यालयहरूको समष्टिगत खर्च ५० प्रतिशतमात्र रहेको जनाउँदै उहाँले कार्यान्वयन पक्ष फितलो भएको बताउनुभयो ।
“आर्थिक वर्षको पहिलो महिना साउनमा बजेट सम्बन्धित निकाय र कार्यालयमा आइपुग्छ, कार्यान्वयन गर्न आठ–नौ किन लाग्छ?, आर्थिक वर्षको सुरुआतमा बजेट कार्यान्वयन गर्न के कुराले छेक्छ ?”, मन्त्री भण्डारीले कार्यालय प्रमुखसँग प्रश्न गर्नुभयो । जिल्लाका कार्यालयहरूले जनता केन्द्रित सेवा प्रवाह गर्दै सुशासन कायम गर्नुपर्नेमा उहाँले जोड दिनुभयो ।
विकासे कार्यालयहरूमा दायित्व सार्ने प्रवृत्तिले अपेक्षाअनुसार काम हुन नसकेको मन्त्री भण्डारीले औँल्याउनुभयो । कतिपय विकासे कार्यालयमा विगतको दायित्व परिपूर्ति गर्ने कामले समस्या निम्ताएको उहाँले बताउनुभयो । पुरानो भुक्तानी दिने विषयमा गुणस्तर र मापदण्ड अपनाएर मात्रै प्रक्रिया अघि बढाउनुपर्ने मन्त्री भण्डारीको भनाइ छ ।
यहाँका विकासे कार्यालयमा पुरानो भुक्तानी दिनुपर्नेको सूची तयार पार्न मन्त्री भण्डारीले प्रमुख जिल्ला अधिकारीलाई निर्देशन दिनुभयो । मनसुनजन्य विपद्का घटना नियन्त्रणका लागि प्रभावकारी पूर्वतयारीमा जुट्न उहाँले सरोकार भएका सबैलाई आग्रह गर्नुभयो ।
विगतका वर्षहरूभन्दा यस वर्ष बढी वर्षा हुने प्रक्षेपण गरिएकाले विपद्का घटना पनि बढ्न सक्ने हुँदा सम्भावित जोखिम नियन्त्रणका लागि तयारीमा लाग्न मन्त्री भण्डारीले प्रमुख जिल्ला अधिकारी दीर्घराज उपाध्यायलाई निर्देशन दिनुभयो । प्रमुख जिल्ला अधिकारी उपाध्यायले विपद् जोखिम नियन्त्रणका लागि आवश्यक पूर्वतयारी भइरहेको मन्त्री भण्डारीलाई जानकारी गराउनुभएको थियो । रासस
