काठमाडौँ। पूर्वप्रधानमन्त्री तथा नेकपा (एकीकृत समाजवादी) अध्यक्ष माधवकुमार नेपालले भ्रष्टाचार मुद्दाका विषयमा वरिष्ठ कानुन व्यवसायीहरूसँग परामर्श लिएका छन्।
अख्तियार दुरुपयोग अनुसन्धान आयोगले भ्रष्टाचारको आरोपमा विशेष अदालतमा मुद्दा दायर गरेपछि नेपाल रौतहटबाट काठमाडौँ फर्किएर वरिष्ठ अधिवक्ता शम्भु थापा र गोविन्द बन्दीसँग सल्लाह गरेका हुन्।
थापाले अदालतमा अभियोग पत्र अध्ययन गरेर बयान दिन तयार रहन सुझाव दिएका छन्। छलफलमा पार्टीका केही शीर्ष नेताहरूको पनि सहभागिता रहेको थियो।
कानुनी सल्लाहपछि नेकपा (एकीकृत समाजवादी) को आकस्मिक बैठक आलोकनगरस्थित केन्द्रीय कार्यालयमा बसिरहेको छ। पतञ्जली आयुर्वेद कम्पनी नेपालले काभ्रेको साँगास्थित नासिकास्थान र महेन्द्रज्योतिमा हदबन्दीभन्दा बढी जग्गा खरिद तथा कम मूल्यमा किनिएको जग्गा महँगोमा बेचबिखनमा नेपालले सहयोग गरेको आरोपमा अख्तियारले भ्रष्टाचार मुद्दा दायर गरेको हो।
नेपालसहित ९३ जनाविरुद्ध १८ करोड ५८ लाख ५० हजार रुपैयाँको मागदाबी गर्दै मुद्दा दायर गरिएको छ।
