काठमाडौँ । नेपाल चीन मामिलाका एकजना जानकार प्राडा.राजीवकुमार झाले समाजवादमा विश्वास गर्नेहरुले नै नेपालमा नेकपाबाट स्थायीत्व सम्भव भएको भन्दै वर्तमान नेकपाको सरकारको निरन्तरता चाहेको बताएका छन् । उनले भने 'चीन लगायतका देशहरू जसले समाजवादमा विश्वास गर्छन्, उनीहरुले मात्र नेपाल कम्युनिस्ट पार्टीमा विभाजनमा नजाओस् भन्ने चाहेको छन् ।'
प्राडा. झाले नेकपाको सुदृढ एकता नै अहिलेको नेपालको आवश्यकता हो भने । उनको विश्लेषण छ 'नेपालको संविधानले परिकल्पना गरेको समाजवाद स्थापनाको लक्ष पूरागर्न पनि अहिलेको सरकार आवश्यक छ जसले नेपालमा स्थायित्व प्रदान गर्छ र समावादीहरुको चाहनामा काम गर्न सक्छ । यो सरकारले पनि समाजवादको परिकल्पनालाई साकार पार्न सकेन भने नेपालमा अरु कसको आशा गर्ने र ती आशा गर्ने दिन कहिले आउने ?'
उनले नेकपाभित्र अझैपनि सहमतिको सम्भावना बाँकी रहेको बताउँछन् । लाखौं कार्यकर्ता र शुभेच्छुक नेकपा विभाजन नहोस भन्ने चाहन्छन् भन्दै झाले ‘भने- 'चीन लगायत समाजवादमा विश्वास गर्ने देशहरू नेकपा नफुटोस् भन्ने चाहिरहेका छन्, यो कुरा शीर्ष नेताले मनन गरुन् र शुभचिन्तक र सहयोगीहरुको कुरा पनि सुनुन् ।’
देशका दुई कम्युनिस्ट पार्टीलाई मिलाएर एउटै कम्युनिस्ट पार्टी बनाएका नेताहरू व्यक्तिगत महत्वकाङ्क्षामा लागेर इतिहास निर्माण गर्ने अवसरबाट चुक्न नहुने उनको विश्लेषण छ ।
‘तत्कालीन एमाले र माओवादी केन्द्र मिल्दा देशमा कम्युनिस्ट पार्टीले झण्डै दुईतिहाइ बहुमत ल्याउन सफल भए । यसले राजनीतिक स्थायित्व र विकासको चाहना पूरा हुँदैछ,’ झा भन्छन, ‘अहिले शीर्ष नेतामा देखिएको अविश्वास र असमझदारी दोस्रो पुस्तामा पुग्दा विश्वासमा रुपान्तरण हुनसक्छ । विभाजन रोक्न दोस्रो पुस्ताका नेताहरू लाग्न जरुरी छ ।’
नेकपाको विभाजनले राजनीतिक स्थायित्व र आर्थिक विकासको जनआकांक्षा पूरा नहुने भन्दै परिवर्तनका पक्षधरले नेकपाको विभाजन रोक्न पहल गर्नुपर्ने उनको विश्लेषण छ । हजारौँ लाखौँ कार्यकर्ता र यो पार्टीलाई देशको पहिलो पार्टी बनाउन संघर्ष गरेकाहरुले पार्टी एक होस् भन्ने चाहना राखेका उनले बताए ।
