सालिन्दाजसो
बर्खाले मेरा आफ्नाहरुको जीवन र वस्तीहरु
बर्खास्त गरिरहेछ सिन्धुपाल्चोकमा !
जसै हिजो राति ठाडो खोलाले जम्बू बजार नै लग्यो भन्ने सुनेँ !
देखें, तस्वीर र दृश्यहरु
एउटा अनौठो ऐंठनले यसरि गाँज्दछ कि
तत्काल त्यहीँ अवतरण गर्न सकूँ
र बाढीपहिरोले थिचिएका जम्बूका आफन्तहरुलाई
प्रत्येक ढुंगाहरु पन्छाउँदै
फोक्सोमा थोरै भएपनि आफ्नो श्वास दिन सकूँ !
सिर्फ भावुकताको बिल्ला नलगाइदिनुहोला
यस्तो अराजनीतिले पनि हिर्काउँछ दिमागमा कैलेकैले कि
देशका शाशकहरु र भूउपयोगनीतिका
विश्वमान्य व्यवहारिक अनि सैद्धान्तिक किताबहरुलाई
एउटै खाल्डोमा राखेर पुरिदिउँ !
–सिन्धुवाद
