सर्लाही। सर्लाहीको पर्सा गाउँपालिका–५ का तसलिम अन्सारी र सलिम अन्सारीमाथि सुँगुरको खोरमा थुनेर कुटपिट गरिएको छ।
शनिबार बिहान १० बजेतिर स्थानीय युवाहरूले उनीहरूलाई खोरमा थुनेर कुटपिट गरेका हुन्। तसलिमकी छोरीको विवाहका लागि सुनचाँदी खरिद विषयमा स्थानीय सुनचाँदी व्यापारी राजिन्द्र साहसँग विवाद भएपछि घटनाले हिंसात्मक रूप लिएको हो।
पसले साहले युवाहरू परिचालन गरी अन्सारी दाजुभाइलाई कुटपिट गराएको आरोप छ। घटनाको भिडियो सामाजिक सञ्जालमा भाइरल बनेपछि प्रहरी सक्रिय भएको हो। जिल्ला प्रहरी कार्यालय सर्लाहीका डीएसपी सरोज राईका अनुसार घटनामा संलग्न ४ जना पक्राउ परेका छन्। थप अनुसन्धान भइरहेको छ।
स्थानीय अगुवाहरूले घटनालाई धार्मिक रङ दिइएको भन्दै चिन्ता व्यक्त गरेका छन्।
