काठमाडौं । नवराज सुवेदी नेतृत्वमा रहेको राजावादीहरुको संयुक्त जनआन्दोलन समितिले यही जेठ १५ गतेदेखि गर्ने राजधानी केन्द्रित आन्दोलनको तयारी तिब्र पार्दै लगेको छ ।
आन्दोलनमा बढीभन्दा बढी जनसहभागिताका लागि उपत्यका जनजागरण अभियान सञ्चालन गर्ने निर्णय भएको छ ।
राप्रपाको केन्द्रीय कार्यालय धुम्बाराहीमा बसेको समितिको बैठकले काठमाडौं, ललितपुर र भक्तपुर केन्द्रित ५ दिने जनजागरण अभियान शुरु गर्ने निर्णय गरेको हो ।
काठमाडौंको साँखुबाट शुरु हुने अभियान काठमाडौंको काँठ क्षेत्र हुँदै ललितपुरबाट भक्तपुरको चाँगुनारायण पुगेर समापन गरिने भएको छ । ‘कार्यक्रम तय गर्न एक कार्यदल बनाइएको थियो, कार्यदलले विस्तृत कार्यक्रम बैठकमा पेश गरेको छ’ स्रोतले भन्यो ।
कार्यक्रम प्रभावकारीरुपमा कार्यान्वयन गर्न शनिबार एक भेला समेत आयोजना गरिएको छ । संयुक्त जनआन्दोलन समितिका संयोजक सुवेदीको अध्यक्षतामा बसेको बैठकमा राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापा, राष्ट्रिय शक्ति नेपालका केशरबहादुर विष्ट, नेपाली कांग्रेस (बिपी), राष्ट्र, राष्ट्रियता, धर्म संस्कृति नागरिक बचाउ अभियान, शिव सेना नेपाल, नेपालका लागि नेपाली, राष्ट्रिय सरोकार मञ्च, विश्व हिन्दु महासंघ लगायतका प्रतिनिधिहरुको सहभागीता रहेको थियो ।
यसैगरी जनआन्दोलनको आवश्यकता, औचित्य र महत्वको बारेमा यही जेठ ६ गते विभिन्न क्षेत्रका प्रबुद्धवर्गसँग अन्तक्र्रिया कार्यक्रम तय गरी तयारी भइरहेको राप्रपा नेपालका महामन्त्री राजाराम बर्तौलाले जानकारी दिए । ‘शीर्ष नेताहरुको उपस्थितिमा अन्तक्र्रिया हुन्छ’ उनले भने ।
