काठमाडौं । पूर्वराष्ट्रपति विद्यादेवी भण्डारीले गौतम बुद्धले दिएका मध्यममार्ग, करुणा र अहिंसाको सन्देश आज पनि झनै सान्दर्भिक रहेको बताउनुभएको छ ।
शान्तिका अग्रदूत गौतम बुद्धको २५६९ औं जन्मजयन्तीको पावन अवसरमा स्वदेश तथा विदेशमा रहनुभएका सम्पूर्णलाई शुभकामना व्यक्त गर्दै पूर्वराष्ट्रपति भण्डारीले नेपालको लुम्बिनीमा जन्मनुभएका बुद्धले मानव जीवनमा करुणा, अहिंसा र शान्तिको मार्ग देखाएको बताउनुभयो । ‘उहाँका शिक्षाहरुले हामीलाई आपसी सम्मान, सहिष्णुता र सन्तुलित जीवनशैलीका लागि प्रेरणा प्रदान गर्दछन् । बुद्धले दिनुभएको मध्यममार्ग, करुणा र अहिंसाको सन्देश आजको विश्वमा झनै सान्दर्भिक बनिरहेको छ,’ भण्डारीको शुभकामना सन्देशमा भनिएको छ ।
पूर्वराष्ट्रपति भण्डारीले आफ्नो जीवन र कर्ममा शान्ति, सहिष्णुता र दयाको भावना अँगाल्दै हामी सबैले समतामूलक, न्यायपूर्ण र सम्भव समाज निर्माणतर्फ अग्रसर हुन सकौं भन्ने शुभेच्छासमेत व्यक्त गर्नुभएको छ ।
