काठमाडौँ । आन्दोलनको क्रममा प्रहरीसँग झडप भएपछि नेपाल शिक्षक महासंघले आकस्मिक बैठक आह्वान गरेको छ ।
आईतबार नयाँ बानेश्वरमा आन्दोलनले उग्र रूप लिएपछि महासंघले आकस्मिक बैठक आह्वान गरेको हो ।
दिउँसो तीन बजे बानेश्वरमा रहेको रत्नराज्य माविमा बैठक बस्ने महासंघ अध्यक्ष लक्ष्मीकिशोर सुवेदीले जानकारी दिए । महासंघका पदाधिकारीहरू, जिल्ला अध्यक्षहरू, आन्दोलन परिचालन समितिका पदाधिकारीहरूलाई बोलाएको बैठकमा आज भएको घटना तथा समग्र आन्दोलनका विषयमा छलफल हुने उनले बताए ।
नयाँ बानेश्वरमा निषेधित क्षेत्र तोडेर संसद भवनतर्फ जान खोजेपछि प्रहरीले आन्दोलनरत शिक्षकहरूमाथि लाठी प्रहार गर्नुका साथै पानीको फोहोरा हानेको थियो । जवाफमा शिक्षकहरुले पनि प्रहरीमाथि ढुंगा प्रहार गरेका थिए ।
