काठमाडौं। नेपाल सुपर लिग (एनएसएल)को उपाधि ललितपुर सिटि एफसीले जितेको छ।
त्रिपुरेश्वरस्थित दशरथ रंगशालामा भर्खरै सम्पन्न फाइनल खेलमा पोखरा थन्डर्सलाई २-१ गोलले हराउँदै ललितपुर लगातार दोस्रोपटक च्याम्पियन बनेको हो ।
खेलको ४२ औं मिनेटमा इमोह एजेकिएलले गोल गर्दै ललितपुरलाई अग्रता दिलाए । मनोज राईको क्रस पासमा उनले हेडिङमार्फत गोल गरे ।६३ औं मिनेटमा सुदिल राईले गोल गर्दै पोखरालाई बराबरीमा ल्याए । स्टेफेन समीर बिलोङले हेडिङ गर्दा आएको रिबाउन्डमा राइले गोल गरेका हुन् ।
७४ औं मिनेटमा पुन: ललितपुरले अग्रता लियो । पापा इबोउ केबेले गोल गर्दै ललितपुरलाई २-१ ले अघि बढाए । एजेकिएलले उपलब्ध गराएको पासमा उनले बललाई नियन्त्रणमा लिदै गोल गर्न सफल भए । त्यसपछि पोखराले गोल गर्ने प्रयास गरेपनि गोल गर्न भने सकेन र ललितपुर विजेता बन्यो ।
विजेता बनेको ललितपुर ले ८० लाख पुरस्कार प्राप्त गर्यो भने उपविजेता पोखराले ३० लाखमा चित्त बुझायो । एक महिना चलेको तेस्रो संस्करणको एनएसएलमा सात टोलिले सहभागिता जनाएका थिए ।
