एजेन्सी । इन्डियन प्रिमियर लिग (आईपीएल) को ३९ औं खेलमा आज कोलकाता नाइट राइडर्स (केकेआर) ले गुजरात टाइटन्स (जीटी) को सामना गर्दैछ । कोलकाताको घरेलु मैदान इडेन गार्डेन स्टेडियममा हुन लागेको खेल नेपाली समय अनुसार बेलुकाको ७ः४५ बजेबाट सुरु हुनेछ। यस सिजनमा दुवै टोली पहिलो पटक आमनेसामने हुँदैछन् ।
यस सिजनमा गुजरातको टोली ७ खेलमा ५ जितसहित अंक तालिकामा पहिलो स्थानमा छ । अर्कोतर्फ, डिफेन्डिङ च्याम्पियन केकेआरको प्रदर्शन त्यति राम्रो भएको छैन । कोलकाताको टोली ७ खेलमा ३ जितसहित अंक तालिकामा छैटौं स्थानमा छ। प्लेअफलाई ध्यानमा राख्दै दुवै टोलीका लागि यो खेल जित्नु निकैँ महत्त्वपूर्ण छ ।
हेड-टु-हेड
टाइटन्स र नाइट राइडर्स आईपीएलमा पाँचौं पटक आमनेसामने हुँदैछन्। अहिलेसम्म यी दुई टोलीबीच ४ वटा आईपीएल खेल भएका छन् । जसमा गुजरातले २ र कोलकाताले १ खेल जितेको छ। एउटा खेल भने वर्षाका कारण रद्द भएको थियो।
रहाणे केकेआरका सर्वाधिक रन स्कोरर
कप्तान अजिंक्य रहाणे केकेआरका सर्वाधिक स्कोरर हुन् । उनले ७ खेलमा कुल २२१ रन बनाएका छन् । आफ्नो डेब्यू खेलमा उनले आरसीबी विरुद्ध ३१ बलमा ५६ रनको अर्धशतक बनाएका थिए । बलिङमा, वरुण चक्रवर्तीले ७ खेलमा १० विकेट लिएका छन् ।
सुदर्शन जीटीका सर्वाधिक रन स्कोरर
गुजरात टाइटन्सका ब्याट्सम्यान साई सुदर्शन टोलीका सर्वाधिक रन स्कोरर हुन् । उनले ७ खेलमा कुल ३६५ रन बनाएका छन् । सुदर्शनले यस सिजनमा अहिलेसम्म ४ अर्धशतक बनाएका छन् । उनी यस सिजनमा सर्वाधिक रन बनाउने खेलाडीको सूचीमा दोस्रो स्थानमा छन्। बलरहरूमा प्रसिद्ध कृष्ण शीर्ष स्थानमा छन्। उनले ७ खेलमा कुल १४ विकेट लिएका छन्।
दुवै टोलीको सम्भावित प्लेइङ-१२
गुजरात टाइटन्सः शुभमन गिल (कप्तान), साई सुदर्शन, जोस बटलर, शाहरुख खान, राशिद खान, राहुल तेवाटिया, अरशद खान, साई किशोर, मोहम्मद सिराज, प्रसिद्ध कृष्ण, इशान्त शर्मा, शेरफान रदरफोर्ड।
कोलकाता नाइट राइडर्स: अजिंक्य रहाणे (कप्तान), क्विन्टन डी कक (विकेटकीपर), सुनील नारायण, भेंकटेश अय्यर, आन्द्रे रसेल, रिंकु सिंह, रमनदीप सिंह, हर्षित राना, वैभव अरोरा, वरुण चक्रवर्ती, एनरिक नोर्त्या, अङ्क्रिश रघुवंशी।
