काठमाडौं । संवैधानिक राजसंस्था स्थापनाको माग गर्र्दै आन्दोलनरत राष्ट्रिय प्रजातन्त्र पार्टी (राप्रपा)ले सिंहदरबारभित्रै सरकारलाई नराम्रोसँग छक्याइदिएको छ । देशको प्रमुख प्रशासनिक केन्द्र सिंहदरबारभित्रै राजतन्त्र पक्षमा नारा लगाएर राप्रपाले चकित बनाइदिएको हो ।
राप्रपाका अध्यक्ष राजेन्द्र लिङ्देनले केही दिनअघिदेखि नै राजसंस्था पुनस्र्थापनाका लागि निषेधित क्षेत्रमा प्रदर्शन गर्ने चेतावनी दिएका थिए । बिहीबार बसेको कार्यसम्पादन समिति बैठकपछि उनले सरकारले नागरिक अधिकारलाई संकुचित बनाएको निष्कर्षसहित त्यसको विरोध स्वरुपसमेत निषेधित क्षेत्र तोड्ने जिकिर गरेका थिए ।
राप्रपाले बिजुलीबजारमा गएर शान्तिपूर्ण सभा गर्ने गरी जिल्ला प्रशासन कार्यालयबाट अनुमति लिएको थियो । तर राप्रपाका अध्यक्ष लिङ्देनको अभिव्यक्तिलाई गम्भीरतापूर्वक लिएर सरकारले सुरक्षा व्यवस्था कडा पारेको थियो ।
त्यति मात्र नभएर गृह मन्त्रालयले निषेधित क्षेत्र तोड्ने प्रयास भएर कारबाही गर्ने चेतावनी दिएको थियो । गृह मन्त्रालयले अनधिकृत गतिविधि गरे कानुनबमोजिम कारबाही गर्ने चेतावनी दिएको थियो ।
खासमा १५ चैतमा भएको तिनकुने हिंसात्मक प्रदर्शन र नेताहरुको गिरफ्तारीपछि पातलिएको आन्दोलनलाई राप्रपा नेताहरु फेरि लयमा फर्काउन चाहन्थे । त्यसका लागि निषेधित क्षेत्रमै पुगेर सांकेतिक प्रदर्शन गर्ने राप्रपा तयारी थियो ।
तर अध्यक्ष लिङ्देनको पूर्वअभिव्यक्ति पछि प्रहरीले बानेश्वर–बिजुलीबजार–माइतीघर क्षेत्रमा उच्च सुरक्षा सतर्कता कायम गर्यो । यो क्षेत्रमा दुई साताभन्दा बढी समयदेखि प्रदर्शनरत शिक्षकहरुलाई आइतबार ११ बजेभित्रै प्रदर्शनसक्न भनियो । बिहानैदेखि बाक्लो प्रहरी परिचालन गरियो ।
यद्यपि प्रहरीको पूर्वतयारीबारे भेउ पाएका राप्रपा नेताहरुले सुकेधारास्थित पार्टी कार्यालयमा बिहानै छलफल गरेर आन्दोलनको नयाँ रणनीति बनाए । बैठकले अध्यक्ष लिङ्देनसहित राप्रपा शीर्ष नेताहरु सिंहदरबारस्थित संसदीय दलको कार्यालय जाने निर्णय गर्यो । त्यहाँबाट निस्किँदा सिंहदरबारभित्रै प्रदर्शन गरेर गिरफ्तारी दिने टुंगो लाग्यो । यसो गर्दा अझ बलियो सन्देश जाने नेताहरुको निष्कर्ष थियो ।
संसदीय दलको कार्यालयभित्र शीर्ष नेताहरु रहँदा प्रहरीले निगरानी गरिरहेको थियो, यद्यपि प्रमुख प्रशासनिक केन्द्रभित्रै नाराबाजी होला भन्ने सुरक्षाकर्मीले सोचेका थिएनन् । सांसद् ज्ञानेन्द्र शाहीले त्यसबेला आफूहरुलाई संसदीय दलको कार्यालयबाट निस्किनै नदिएको भन्दै टिप्पणी गरिरहेका थिए ।
त्यसको केही बेरमा सञ्चारकर्मीहरुका साथ निस्किएका लिङ्देन, शाही, राप्रपा उपाध्यक्ष बुद्धिमान तामाङ लगायतले सिंहदरबारभित्रै विरोध प्रदर्शन गरे । सरकारको आलोचना गरिएको पर्चा देखाएपछि प्रहरी अधिकृतहरु आएर उनीहरुको हातबाट खोसे ।
सिंहदरबार गेट नजिकै पुग्ने वित्तिकै लिङ्देन, शाही, तामाङसहित अमर परियार, सरोज घिमिरे, किरण दुवाल र राप्रपा युवा मोर्चा अध्यक्ष कैलाश कटवाल निषेधित क्षेत्रमा प्रदर्शन गरेको आरोपमा पक्राउ परे ।
यसरी राप्रपाले सरकारलाई जिल्याउँदै विरोध प्रदर्शन मात्र गरेन, सिंहदरबारजस्ता संवेदनशील ठाउँमै नाराबाजी गरेर आफ्नो पूर्वघोषित कार्यक्रम पूरा गरेको छ ।
आइतबारको प्रदर्शनपछि राप्रपा निकै उत्साहित भएको छ । राप्रपाका नेतासमेत रहेका सांसद ज्ञानेन्द्रबहादुर शाहीले साँझ सामाजिक सञ्जालमा पोस्ट गर्दै सिंहदरबारभित्रै प्रदर्शन गरेर सरकारको मुटुमा ढ्यांग्रो बजाइएको दाबी गरेका छन् ।
शाहीले सामाजिक सञ्जालमा लेखेका छन्–
आज राप्रपाको शक्ति प्रदर्शन होइन हामीले शुभचिन्तक र राष्ट्रवादीहरूलाई आज आमन्त्रितसम्म गरेका थिएनौं। आज त कसैलाई बोल्न नपाउने गरेर निषेधित क्षेत्र बनाउँदै जनताको मुख थुन्ने र भ्रष्टहरू रमाउने भ्रष्टाचारीहरूको अखडा सिंहदरबार भित्रै उनीहरूकै मुटुमा गएर ढ्याङ्ग्रो बजाउनुपर्ने थियो। त्यसैले हामीले सिंहदरबार भित्रै प्रदर्शन गरेका हौँ।
यो त सुरुवात मात्रै हो।देशलाई कंगाल बनाउने यो भ्रष्टाचारीतन्त्रको अन्त्य नगरी देशमा सुशासन र समृद्धि हुन सक्दैन। अवस्था सुधार्नका लागि व्यवस्था सुधारन आवश्यक छ। नीति र नियम जनमुखी भएनन् भने व्यक्तिले मात्रै समाज परिवर्तन गर्न सक्दैन ।
