काठमाडौँ । आईसीसी यू–१९ विश्वकप एसिया छनोटमा घरेलु टोलि नेपालले लगातार तेस्रो जित निकालेको छ ।
भर्खरै सम्पन्न खेलमा नेपालले हङकङलाई ९ विकेटले हराएको हो । तल्लो मुलपानी क्रिकेट मैदानमा हङकङले दिएको ११६ रनको सामान्य लक्ष्य नेपालले १२.३ ओभरमा १ विकेट मात्र गुमाएर पूरा गर्यो ।
नेपाललाई सहज जित दिलाउन ओपनर साहिल पटेल ४२ तथा कप्तान नरेन भट्ट ३९ रनमा नटआउट रहे । त्यसअघि निरज यादवले २३ रनको योगदान दिए ।
मुलपानी क्रिकेट मैदानमा टस हारेर पहिला ब्याटिङ गरेको हङकङ ४६ ओभर २ बलमा ११५ रनमा अलआउट भयो ।
हङकङलाई सस्तोमा समेट्न नेपालका युवराज खत्रीले ४ विकेट लिए । यस्तै, विपिन शर्माले ३, सन्तोष यादवले २ र अशोक धामीले १ विकेट हात पारे ।
ब्याटिङमा हङकङका लागि शिभ मथुरले सर्वाधिक ६३ रन बनाए । यस्तै, आर्या पन्जवानीले १३ तथा वीर माथुरले १२ रन जोडे ।
