काठमाडौँ । आज पञ्जाब किंग्सले कोलकाता नाइट राइडर्ससँग खेल्दैछ । खेलअघि श्रेयस अय्यरको कप्तानीमा रहेको टोलीका लागि नराम्रो खबर आएको छ ।
टोलीका तीव्र गतिका बलर लोकी फर्गुसन चोटका कारण सम्पूर्ण प्रतियोगिताबाट बाहिरिएका छन् । हैदराबाद विरुद्धको खेलमा उनलाई गम्भीर चोट लागेको थियो, त्यसपछि उनी मैदानबाट बाहिरिएका थिए ।
‘लकी फर्गुसन अनिश्चित कालका लागि मैदान बाहिर छन् र प्रतियोगिताको अन्त्यसम्ममा उनी फर्कने सम्भावना धेरै कम छ । मलाई लाग्छ उनी गम्भीर चोटबाट ग्रसित छन् ।’ पञ्जाब किंग्सका बलिङ प्रशिक्षक जेम्स होप्सले मुल्लानपुर रंगशालामा कोलकाता नाइट राइडर्स (केकेआर) विरुद्धको खेल अघि भने ।
सनराइजर्स हैदराबादविरुद्धको छैटौं ओभरको दोस्रो बलमा फर्गुसनको देब्रे खुट्टामा चोट लागेको थियो । फिजियो आए र उनीसँग परामर्श गरेपछि, उनी ओभरको बीचमा मैदानबाट बाहिरिए र फेरि फर्किएनन् । यो खेल हैदराबादले ८ विकेटले जित्यो ।
२०२५ को आईपीएलमा लोकी फर्गुसन
पञ्जाब किंग्सले लिलामीमा फर्ग्युसनलाई २ करोड रुपैयाँमा किनेको थियो । उनी आइपीएल इतिहासमा दोस्रो सबैभन्दा फास्ट बलर हुन्, जसले गुजरात टाइटन्सबाट खेल्दा १५७.३ किलोमिटर प्रतिघण्टाको गति हासिल गरेका थिए । केही दिन अघि कप्तान श्रेयस अय्यरले पनि उनी टोलीको लागि एक महत्वपूर्ण बलर भएको बताएका थिए ।
आईपीएल २०२५ मा खेलेका ४ खेलमा उनले ६८ बल बलिङ गरेका छन्, जसमा उनले ९.१८ को इकोनोमीमा १०४ रन दिएका छन् । उनको नाममा ५ विकेट छन् । आईपीएलको कुरा गर्दा, उनले २०१७ देखि ४९ खेलमा ५१ विकेट लिएका छन्, उनको उत्कृष्ट स्पेल २८ रनमा ४ विकेट लिनु हो ।
