काठमाडौं: राष्ट्रिय प्रजातन्त्र पार्टी (राप्रपा) ले चैत १५ गते तीनकुनेमा भएको घटनालाई लिएर राज्यले निर्मम दमन गरेको आरोप लगाउँदै संयुक्त राष्ट्रसंघीय मानवअधिकार उच्चायुक्तको कार्यालयमा ध्यानाकर्षण पत्र बुझाएको छ।
आज राप्रपाको प्रतिनिधिमण्डलले ललितपुरस्थित संयुक्त राष्ट्रसंघीय मानवअधिकार उच्चायुक्तको कार्यालय पुगेर उक्त पत्र एशिया प्यासिफिक क्षेत्रका मानवअधिकार अधिकृत रघु मेननलाई हस्तान्तरण गरेको हो।
ध्यानाकर्षण पत्रमा चैत १५ गते राप्रपाले आयोजना गरेको प्रदर्शनमा सुरक्षाकर्मीहरूले अत्यधिक बल प्रयोग गरेको, र बिना कुनै कारण नेताहरुलाई गिरफ्तार गरी थुनामा राखिएको भन्दै गम्भीर आपत्ति जनाइएको छ। राप्रपाले यसलाई मानवअधिकार उल्लंघनको रुपमा व्याख्या गरेको छ।
प्रतिनिधिमण्डलमा राप्रपाका महामन्त्री तथा सचिवालय प्रमुख राजेन्द्र गुरुङ, महामन्त्री शरदराज पाठक, र युवा केन्द्रीय नेताहरूको सहभागिता रहेको थियो।
राप्रपाले यस्ता घटनाहरु दोहोरिन नदिन र पक्राउ परेका आफ्ना नेताहरूको यथाशीघ्र रिहाइको माग पनि गरेको छ। यसअघि पनि राप्रपाले सडक आन्दोलनमार्फत आफ्ना मागहरू सार्वजनिक गर्दै आएको छ।
