काठमाडौं । लगातार प्रदू्रषणमा विश्वकै शीर्ष स्थानमा रहँदै आएको काठमाडौंको आकाश आज पनि धुम्म छ । आज काठमाडौं विश्वकै सबैभन्दा प्रदूषित शहर बनेको छ । तर अब पानी पर्ने सम्भावना देखिएको छ ।
भारतमा विकसित न्यूनचापीय प्रणाली र पश्चिमी तथा स्थानीय वायुको आंशिक असरले काठमाडौं उपत्यकासहितका जिल्लाहरुमा आज बादल लागेको छ ।
कोशी प्रदेशबाट भित्रिएको यो प्रणालीको असरले कोशीदेखि लुम्बिनी प्रदेशसम्मका पहाडी जिल्लाहरुमा छिटपुटदेखि हल्का खालको वर्षा हुने सम्भावना समेत छ । वर्षाले अहिलेको प्रदूषणबाट केही राहत मिल्ने छ ।
जल तथा मौसम पूर्वानुमान महाशाखाले आज अपराह्नदेखि काठमाडौं उपत्यकासहित पहाडी जिल्लाहरुमा पानी पर्ने सम्भावना रहेको जनाएको छ । आजको तुलनामा भोलि अलि बढी पानी पर्ने सम्भावना छ । पूर्वदेखि पश्चिमसम्मै पहाडी जिल्लाहरुमा वर्षाको सम्भावना देखिएको छ । मंगलबार सामान्य वर्षा भए पनि भोलि हल्कादेखि मध्यम खालको वर्षाको सम्भावना रहेको विभागले जनाएको छ ।
महाशाखाका अनुसार विहीबारसम्मै पानी पर्ने सम्भावना छ । यसको प्रभाव भने नेपालका पूर्वी भूभागमा बढी र पश्चिम भूभागमा कम देखिने छ ।
