काठमाडौं । संवैधानिक राजतन्त्रसहितको प्रजातन्त्रको वकालत गर्दै आएको राष्ट्रिय प्रजातन्त्र पार्टी (राप्रपा) ले आज काठमाडौंको बल्खुमा सभा गर्दैछ । संवैधानिक राजतन्त्र र हिन्दू राज्य पुनस्र्थापनाका लागि दबाब दिने उद्देश्यले राप्रपाले जुलुससहित सभा गर्न लागेको हो । राप्रपालले बाहिरी जिल्लाबाट मानिसहरु सहभागी हुने दाबी गरेको छ ।
राप्रपाले प्रदर्शन गर्न लागेपछि सरकार भने झस्किएको छ । उसले सभा तथा जुलुलाई लक्षित गर्दै सुरक्षा निकायको उपस्थित बनाउने भएको छ । राप्रपाको सभामा नेपाल प्रहरी, सशस्त्र प्रहरी बल र राष्ट्रिय अनुसन्धान विभागका टोलीहरू गरी तीन निकायका सुरक्षाकर्मीहरू खटिने छन् ।
राष्ट्रिय अनुसन्धान विभागका टोलीहरूले सूचना संकलनको काम गर्नेछन् भने नेपाल प्रहरी र सशस्त्र प्रहरीले भने प्रदर्शनलाई शान्तिपूर्ण बनाउन भूमिका खेल्नेछन् । त्यही अनुसार सरकारले सुरक्षा रणनीति बनाएर परिचालन गर्न लागेको हो ।
जिल्ला सुरक्षा समितिको सुरक्षा विश्लेषणपछि राप्रपाले माग गरेको भृकुटीमण्डपमा नभई बल्खु क्षेत्रमा प्रदर्शन तथा सभाका लागि ठाउँ दिइएको छ । बल्खुको सभाका लागि भने २ हजार प्रहरी परिचालन गरिने बताइएको छ । ती मध्ये कतिपय सादा पोशाकका सुरक्षाकर्मी हुने छन् । त्यसैगरी सशस्त्र प्रहरीले पनि आवश्यकताअनुसार आफ्ना कर्मचारी खटाउने तयारी गरेको छ ।
चैत १५ गते तीनकुनेमा राजावादी समूहले गरेको प्रदर्शन हिंसामा परिणत भएपछि सरकारले आज विशेष सतर्कता अपनाएको छ । राप्रपाले गर्ने जुलुस र सभाको सीसी क्यामेरा, बडी क्यामेरा र ड्रोनबाट निगरानी गरिने भएको छ । उच्छृङ्खल गतिविधि गर्नेहरूलाई विशेष निगरानी राख्दै कारबाहीको प्रक्रिया समेत अघि बढाइने दाबी प्रहरीले गरेको छ ।
राजावादीका तर्फबाट चैत १५ गते दुर्गा प्रसाईंको नेतृत्वमा भएको प्रदर्शन हिंसात्मक बनेको थियो । जसमा कीर्तिपुरका सविन महर्जन र पत्रकार सुरेश रजगको मृत्यु भएको थियो । यता प्रहरीले अनाश्यक दमन गरेको भन्दै त्यसको आलोचना समेत भइरहेकै छ ।
तीनकुने घटनाबाट प्रहरी झस्किएकाले नयाँ सुरक्षा रणनीति बनाइएको हो । तीनकुनेजस्तो बल्खु क्षेत्र संवेदनशील नभएको र तीनकुनेको जस्तो उच्छृङ्खल गतिविधि समेत नहुने सुरक्षा विश्लेषण गरिएको छ ।
यता राप्रपाले ठूलो संख्यामा जुलुस आएर बल्खुमा सभा हुने र त्यसलाई अध्यक्ष राजेन्द्र लिङ्देनले सम्बोधन गर्ने बताइएको छ ।
सभाअघि साढे ११ बजेदेखि उपत्यकाका विभिन्न ठाउँहरुबाट जुलुस निस्कने छ । प्रदर्शनलाई शान्तिपूर्ण बनाउन राप्रपाले ठूलो संख्यामा स्वयम्सेवक परिचालन गर्ने जनाएको छ । राप्रपाको प्रदर्शनलाई कमल थापा नेतृत्वको राप्रपा नेपालले समेत समर्थन गरेको छ । जगमान गुरुङ नेतृत्वको राजतन्त्र पुनस्र्थापना संयुक्त जनआन्दोलन समिति, शिव सेना नेपाललगायतले समेत आजको प्रदर्शनलाई समर्थन गरेका छन् ।
