काठमाडौं । नेपाली सेनाको टोली भूकम्प प्रभावितका लागि अत्यावश्यक राहत तथा मेडिकल सामग्री र उद्दार कार्यको लागि म्यानमार प्रस्थान गरेको छ ।
विभिन्न निकायमा रहेको मौज्दात सामग्री तथा निजी क्षेत्रबाट प्राप्त मेडिकल सामग्री तथा औषधी र राहत लिएर सेनाको टोलि म्यानमार प्रस्थान गरेको हो ।
प्रमुख सेनानी रामचन्द्र श्रेष्ठको नेतृत्वमा १२ जना चिकित्सकीय टिम, चार जना बन्दोबस्ती टिम र ६ जना क्रु मेम्बरसहित २२ सदस्यीय टोलि नेपाली सेनाको विमानमार्फत म्यानमारतर्फ प्रस्थान गरेको नेपाली सेनाले जनाएको छ । सेनाको टोलिले एक साता त्यहीँ रहेर भूकम्पमा परी घाइतेहरुको स्वास्थ्य उपचारमा खटिनेछ ।
मन्त्रिपरिषद्को सोमबार राति बसेको बैठकले राहत सामग्री तथा औषधि र मेडिकल उपकरणसहित नेपाल वायुसेवा निगमको जहाज पठाउने निर्णय गरेको थियो ।
गत चैत १५ गते म्यानमारमा ७ दशमलव ७ रेक्टर स्केलको भूकम्पले ठूलो जनधनको क्षति पुर्याएको छ । भूकम्पमा परी अहिले सम्म झण्डै २ हजार भन्दा बढि मानिसहरुले ज्यान गुमाएका छन् भने हजारौं घाइते छन् ।
