काठमाडौँ । लखनउ सुपर जायन्ट्सलाई ८ विकेटले पराजित गर्दै पञ्जाब किंग्सले यो सिजनको आईपीएलमा दोस्रो जित दर्ता गरेको छ ।
लखनउको एकना रंगशालामा मंगलबार भएको खेलमा टस हारेर पहिले ब्याटिङ गरेको आयोजक टोली लखनउ सुपर जाइन्ट्सले २० ओभरमा सात विकेट गुमाएर १७१ रन बनाएको थियो ।
जवाफमा पञ्जाबले १६.२ ओभरमा दुई विकेट गुमाएर १७७ रन बनायो र खेल जित्यो। पञ्जाबले चौथो पटक सिजनको सुरुमा दुई खेल जितेको हो ।
यसअघि टोलीले सन् २०१४, २०१७ र २०२३ मा पहिलो दुई खेल जितेको थियो । लगातार दुई खेलमा जित हात पार्दै पञ्जाब ४ अंकसहित अंक तालिकाको दोस्रो स्थानमा पुगेको थियो ।
लक्ष्य पछ्याउने क्रममा पञ्जाबलाई २६ रनको स्कोरमा पहिलो झट्का लागेको थियो । दिग्वेश राठीले प्रियांश आर्यलाई शार्दुल ठाकुरबाट क्याच आउट गराए । उनले आठ रन मात्रै बनाउन सके । यसपछि ओपनिङ ब्याट्सम्यान प्रभसिमरन सिंह र श्रेयस अय्यरले टोलिलाई सम्हाले । यी दुईबीच दोस्रो विकेटका लागि ४४ बलमा ८४ रनको साझेदारी भयो ।
यसै क्रममा दिग्वेश राठीले प्रभासिमरनलाई रवि बिश्नोईको हातमा क्याच आउट गराए । उनले आफ्नो आईपीएल करियरको चौथो अर्धशतक मात्र २३ बलमा पूरा गरे । उनी ४४ बलमा ६९ रन बनाएर आउट भए । यसपछि कप्तान श्रेयसले नेहल वढेराको साथ पाए ।
दुवैले ३७ बलमा ६७ रनको अविजित साझेदारी गर्दै टोलीलाई जित दिलाए । अय्यरले लगातार दोस्रो खेलमा अर्धशतक बनाए भने नेहलले ४३ रन बनाए ।
यसअघि अर्शदीप सिंहको घातक बलिङमा पञ्जाबले लखनउलाई १७१ रनमा सीमित गरेको थियो । लखनउका लागि निकोलस पुरानले सर्वाधिक ४४ रन बनाए । उनका अलावा आयुष बडोनीले ४१, एडेन मार्करामले २८, अब्दुल समदले २७ र डेभिड मिलरले १९ रन बनाए ।
योसँगै मिचेल मार्स र आवेश खानले खाता पनि खोल्न सकेनन् । लखनउका लागि अर्शदीप सिंहले ३ विकेट लिए भने लोकी फर्गुसन, ग्लेन म्याक्सवेल, मार्को यान्सेन र युजवेन्द्र चहलले एक–एक विकेट लिए ।
