काठमाडौँ । वानिन्दु हसरंगाको घातक बलिङको मद्दतमा राजस्थान रोयल्सले चेन्नई सुपर किंग्सलाई ६ रनले पराजित गर्दै आईपीएलमा जितको खाता खोलेको छ ।
टस हारेर पहिले ब्याटिङ गरेको राजस्थानले २० ओभरमा ९ विकेट गुमाएर १८२ रन बनाएको थियो । जवाफमा चेन्नईले निर्धारित ओभरमा ६ विकेट गुमाएर १७६ रन मात्रै बनाउन सक्यो । उसका लागि ऋतुराज गायकवाडले सर्वाधिक ६३ रन बनाए ।
लक्ष्य पछ्याउँदा सीएसकेको सुरुवात खराब रह्यो । उसलाई पहिलो ओभरमा जोफ्रा आर्चरले पहिलो झट्का दिए । उनले रचिन रविन्द्रलाई आफ्नो शिकार बनाए । रचिनले खाता पनि खोल्न सकेनन् । यसपछि राहुल त्रिपाठी र कप्तान ऋतुराज गायकवाडले जिम्मेवारी सम्हालेका थिए ।
यी दुईबीच दोस्रो विकेटका लागि ३९ बलमा ४६ रनको साझेदारी भयो । त्रिपाठी २३ रन बनाएर आउट भए भने गायकवाडले ४४ बलमा ६३ रन बनाए । उनका अलावा शिवम दुबेले १८ रन, विजय शंकरले ९ रन, महेन्द्र सिंह धोनीले १६ रन बनाए ।
अन्तिम ओभरमा सन्दीप शर्माले पूर्व कप्तानलाई शिमरोन हेटमायरबाट क्याच आउट गराए । रविन्द्र जडेजा र जेमी ओभरटन क्रमशः ३२ र ११ रनमा अविजित रहे । यस खेलमा राजस्थानका वानिन्दु हसरंगाले ४ विकेट लिए । उनी बाहेक जोफ्रा आर्चर र सन्दीप शर्माले एक–एक सफलता हात पारे ।
राजस्थानले झट्काका साथ इनिङ सुरु गर्यो । यशस्वी जैसवाल (४ रन) लाई पहिलो ओभरमा खलिल अहमदले अश्विनको हातमा क्याच आउट गराए । तर, त्यसपछि तेस्रोक्रममा आएका नितिश राणाले जिम्मेवारी सम्हाले ।
उनले ओपनर सञ्जु सामसनसँग दोस्रो विकेटका लागि ८२ रनको साझेदारी गरे र चेन्नईविरुद्धको पावरप्लेमा तेस्रो सर्वाधिक स्कोरर बने । पावरप्लेमा राजस्थानले ७९/१ रन बनाएको थियो ।
इम्प्याक्ट प्लेयरका रुपमा आएका सञ्जु सामसन १६ बलमा २० रन बनाएर आउट भए । उनलाई नूर अहमदले प्याभिलियनको बाटो देखाए । यसपछि नितिशलाई रियान परागको साथ मिलेको थियो । यी दुईबीच २४ बलमा ३८ रनको साझेदारी भएको थियो ।
यस क्रममा बायाँ हाते ब्याट्सम्यान नितिशले २१ बलमा आफ्नो १९ औं अर्धशतक पूरा गरे । उनी ३६ बलमा ८१ रन बनाएर आउट भए । धोनीले उनलाई स्टम्प गरेका थिए । १२४ रनमा तीन विकेट गुमाएपछि राजस्थानको इनिङ्स खस्कियो ।
एक छेउमा उभिएका कप्तान रियान परागले शिमरोन हेटमायरको साथ पाए पनि यो साझेदारी २६ रन मात्रै बन्यो ।
परागलाई पाथिरानाले बोल्ड गरे । उनले २ चौका र २ छक्का प्रहार गर्दै ३७ रन बनाउन सफल भए । उक्त खेलमा ध्रुव जुरेलले तीन, वानिन्दु हसरंगाले चार र कुमार कार्तिकेयले एक रन बनाए ।
महिष तिक्षाणा र तुषार देशपाण्डे क्रमशः दुई र एक रन बनाएर अविजित रहे । जोफ्रा आर्चरले खाता पनि खोल्न सकेनन् । चेन्नईका तर्फबाट खलिल अहमद, नुर अहमद र मथिशा पथिरानाले दुई–दुई विकेट लिए भने आर अश्विन र रविन्द्र जडेजाले एक–एक विकेट लिए ।
चालू प्रतियोगितामा तीन खेलमा राजस्थानको यो पहिलो जित हो । अर्कोतर्फ चेन्नईको यो लगातार दोस्रो हार हो । जितसँगै राजस्थान अंक तालिकाको नवौं स्थानमा पुगेको छ । जबकि, चेन्नई सातौं स्थानमा छ। रोयस ल्यालेन्जर्स बैंगलोर चार अंक र नेट रन रेट २.२२६ का साथ शीर्षस्थानमा छ ।
