काठमाडौं । एसियाली मुलुक म्यानमारमा शुक्रबार दिउँसो शक्तिशाली भूकम्प गएको छ । राजधानी यांगुनको आसपास केन्द्रबिन्दु भएर आज ७.७ म्याग्नीच्युडको भूकम्प गएको हो ।
भूकम्पको झट्का थाइल्यान्ड र चीनमा समेत महसुस भएको अन्तर्राष्ट्रिय सञ्चारमाध्यमहरूले जनाएका छन् ।
म्यानमारमा भूकम्पले ठूला ठूला भवनहरू भत्किएके छन् भने मानिसहरुका बीचमा भागदौड मच्चिएको छ । त्यस्तै अवस्था थाइल्याण्डमा पनि छ ।
भूकम्प गएपछि मानिसहरू घरबाहिर निस्किएर सडक र खाली ठाउँमा जम्मा भएका छन् । सडकमा चिरा परेको देखिएको छ भने कैयौँ घर भत्किएका देखिएको छ ।
यो भूकम्पका कारण थाइल्याण्डमा आगामी हप्ता हुन लागेको बिमस्टेकको छैटौँ शिखर सम्मेलन पनि स्थगित हुन सक्ने अनुमान गरिएको छ ।
म्यानमार र थाइल्याण्ड दुवै देश सो समूहका सदस्य हुन् । कुनै एक देशको सहभागिता नहुने हो भने सम्मेलन रोकिन्छ । म्यानमार सरकारले त्यहाँका छ स्थानमा संकटकाल नै घोषणा गरेर सहयोगका लागि अन्तर्राष्ट्रिय दाताहरुसँग आग्रह गरिरहेको छ ।
नेपालका प्रधानमन्त्री केपी ओली र परराष्टमन्त्री डा आरजु राणा देउवा सो सम्मेलनमा सहभागी हुने कार्यक्रम तय भएको थियो । साथै प्रधानमन्त्रीले थाइलाण्डको औपचारिक भ्रमण पनि गर्ने कार्यक्रम नेपाल सरकारले तय गरेको थियो ।
फोटो- एफपी/ रासस
