एजेन्सी । भारतीय क्रिकेट कन्ट्रोल बोर्ड (बीसीसीआई) ले आईपीएल २५ मा बलमा थुक लगाउने प्रतिबन्ध हटाएको छ ।
समाचार एजेन्सी पीटीआईका अनुसार बोर्डको आईपीएल समितिले बिहीबार मुम्बईमा कप्तानसँगको बैठकमा सहमतिमा पुगेर यो निर्णय गरेको हो । तर, बोर्डले यसबारे आधिकारिक धारणा भने दिएको छैन ।
कोरोना भाइरसका कारण बोर्डले २०२० मा बलमा थुक लगाउन प्रतिबन्ध लगाएको थियो तर आईसीसीले अन्तर्राष्ट्रिय क्रिकेटमा यो नियम अझै खुकुलो गरेको छैन ।
बैठकले कम्मरभन्दा माथि बल गएमा नोबल र लेग स्टम्प बाहिर वा अफ वा वाइड भएमा डीआरएस बोलाउने निर्णय पनि स्वीकृत गरेको छ ।
स्लो ओभर रेटका कारण कप्तानलाई प्रतिबन्ध नगर्ने निर्णय पनि भएको छ । हार्दिक पाण्ड्या र ऋषभ पन्तलाई एक एक खेलको प्रतिबन्ध लगाइएपछि यो निर्णय गरिएको हो ।
बलमा थुक लगाउनाले फास्ट बलरहरूलाई सबैभन्दा धेरै मद्दत गर्छ । यसले बललाई राम्रो स्विङ बनाउँछ । बलर र फिल्डरहरूले बललाई कपडाले रगड्ने र थुक लगाउने गरेको तपाईंले याद गर्नु भएको होला ।
तिनीहरू एक तर्फ बलको चमक कायम राख्न प्रयास गर्छन् । ताकि बल स्विंग गर्न सजिलो हुन्छ । यस प्रक्रियामा, धेरै पटक उनीहरूले बलसँग धेरै छेडछाड गर्छन्, जुन बल टेम्परिङको दायरामा आउँछ ।
भारतीय बलर मोहम्मद शामीले च्याम्पियन्स ट्रफीको समयमा बलमा थुक लगाउने नियममा परिवर्तन गर्न माग गरेका थिए । उनले पत्रकार सम्मेलनमा भनेका थिए, ‘आधुनिक क्रिकेट बलरका लागि कठिन भएको छ । रिभर्स स्विङ गर्न गाह्रो छ, तर आईसीसीले बलमा थुक लगाउन प्रतिबन्ध लगाएको छ ।’
