खोटाङ । खोटाङको हलेसी तुवाचुङ नगरपालिकामा डढेलोबाट ६ घर जलेर नष्ट भएका छन् । केही पशुचौपायाको पनि मृत्यु भएको छ ।
हलेसी तुवाचुङ नगरपालिका–५ दुर्छिमको गणेशटारस्थित तेर्सालुङ सामुदायिक वनमा लागेको डढेलो गाउँ पस्दा चुमाखु दापसामा बस्ने पूर्णबहादुर राईको घरमा क्षति पुगेको छ ।
यसैगरी सोही स्थानका गजबहादुर राईको दुई तले घर पूर्णरुपमा क्षति भएको छ । यस्तै दिलकुमारी राई, घनश्याम राई, रणबहादुर राई तथा दीर्घराज राईको घर जलेर नष्ट भएका हुन् ।
डढेलबाट गाउँमा आगो सल्किएसँगै स्थानीयको भागाभाग भएको थियो । हुरिबतास चलेकाले हिजो साँझ त अवस्था निकै अत्यासलाग्दो नै भएको स्थानीयले बताएका छन् ।
आगो हिजो सुरु भएर घर जलेको चुमाखु गणेशटार क्षेत्रमा अहिले नियन्त्रण हुने स्थितिमा पुगेको नगरपालिकाका उपप्रमुख रमेशकुमार राउतले जानकारी दिनुभएको छ । तर अर्को क्षेत्र रातमाटे वानम्लातर्फ आगो बढिरहेकाले त्यस क्षेत्रमा जोखिम छ । आगो नियन्त्रण गर्न रणभीम गण दिक्तेल, हलेसी सशस्त्र प्रहरी गुल्म दिक्तेल, इलाका प्रहरी कार्यालय हलेसीको टोलीसहित स्थानीय नागरिक सक्रिय छन् ।
