कैलाली । धनगढीको एक सामुदायिक वनमा दुई जना युवा मृत अवस्थामा फेला परेका छन् ।
धनगढी उपमहानगरपालिका–९ स्थित सालघारी सामुदायिक जंगलमा धनगढी उपमहानरपालिका–१० का अन्दाजी ३० वर्षका देवल चौधरी र सोही ठाउँका अन्दाजी ३२ वर्षका कैदा राना मृत फेला परेका हुन् ।
चौधरीको शव साइकलमा सामान बाँध्ने ट्युबको डोरीले पासो लगाएर जमानुको रुखमा झुण्डिएको अवस्थामा र रानाको शव भुईँमा फेला परेको जिल्ला प्रहरी कार्यालय कैलालीका डीएसपी तथा प्रवक्ता कविन्द्र सिंह बोहोराले बताए । चौधरीको शवको करिब १५ मिटर पर रानाको शव फेला परेको उनले बताए ।
दुबैजनाको शब मुचुल्का गरेर उठाईएको डीएसपी बोहोराले बताए । शव पोस्टमार्टमका लागि पठाउन लागिएको उनले बताए । घटनाबारे अनुसन्धान भइरहेको छ ।
