वासिङ्टन डिसी। युक्रेन मामिलालाई लिएर अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोदिमर जिलेन्स्कीबीच घोचपेच चलिरहेका बखत राष्ट्रपति जिलेन्स्की वासिङ्टन डिसी पुग्नु भएको छ ।
रूस र अमेरिकाबीच युक्रेन मामिलालाई लिएर साउदी अरबमा वार्ता सुरू भएसँगै युक्रेनले त्यस वार्ताप्रति शंसय राख्दै असन्तोष जनाएको थियो । खासगरी युद्धरत युक्रेनलाई वार्तामा सहभागी नगराएको भन्दै जिलेन्स्किले रोश प्रकट गरेका थिए । युरोपेली मुलुकहरूले पनि युक्रेनको माग जायज रहेको बताएका थिए ।
तर अमेरिकी राष्ट्रपति ट्रम्पले जिलेन्स्कीलाई ‘डिक्टेटर’ को संज्ञा दिँदै अमेरिकाले युक्रेनमा थप आर्थिक, सैनिक र राजनीतिक सहयोग र समर्थन नगर्ने बताएका थिए ।
यसबीच अमेरिकालाई फकाउन जिलेन्स्कीले दुईवटा प्रस्ताव अघि सारे: १, युक्रेनमा शान्ति कायम भए राष्ट्रपति पद त्याग्न तयार छु , र २, अमेरिकी माग बमोजिम युक्रेनका क्रिटिकल खनिज (विद्युत गाडीको लागि जरूरी खनिजहरू जस्तै लिथियम) अमेरिकालाई दिने । जिलेन्स्कीले यी शर्तहरू अघि सार्दै गर्दा युक्रेनको सुरक्षा प्रत्याभूति अमेरिकाले गरिदिनु पर्ने शर्त अघि सारेका छन् ।
के जिलेन्स्कीको यो शर्त ट्रम्पले स्वीकार गर्लान् ? यसको अझै टुंगो छैन । उनले युक्रेनी नेतृत्वमाथि निरन्तर दबाब बढाइरहेका छन् । युक्रेन मामिलामा छलफल गर्न हालै वासिङ्टन पुगेका फ्रेन्च राष्ट्रपति इमानुएल म्याँक्रो र बेयायती प्रधानमन्त्री केर स्टार्मरलाई ट्रम्पले खासै महत्व दिएनन् ।
ट्रम्पले युक्रेनलाई युरोपले सहयोग गर्न र सुरक्षा प्रत्याभूति दिन सक्ने सुझाएर बल युरोपेली मुलुकको कोर्टमा फालिदिएका छन् । अमेरिकी आडभरोसा र सहयोग बेगर युक्रेनको अस्तित्व नै संकटमा पर्ने निश्चित छ किनभने अहिले रसियालाई रोक्न युद्धभूमिमा अमेरिकी हतियार नै सार्थक सिद्ध भएका छन् ।
यहाँनेर भुल्न नहुने कुरा के भने अमेरिकाको राष्ट्रपति निर्वाचित भए रूस-युक्रेन युद्ध अन्त्य गर्ने ट्रम्पले चुनावी प्रचारका क्रममा बताउँदै आएका थिए । नेपाली सहित लाखौंको ज्यान लिइसकेको यो युद्ध के कसरी अन्त्य हुन्छ हेर्न बाँकी छ ।
