एजेन्सी । पाकिस्तानका कप्तान मोहम्मद रिजवानले च्याम्पियन्स ट्रफीको सेमिफाइनलको रेसबाट टीम बाहिरिएको विषयमा स्पष्टीकरण दिएका छन् । उनले टोलीमा दुई खेलाडी साइम अयुब र फखर जमानको अनुपस्थिति मुख्य कारण रहेको बताए । दुवै चोटका कारण प्रतियोगिताबाट बाहिरिएका थिए ।
अयुब प्रतियोगिता सुरु हुनुअघि नै खुट्टाको चोटका कारण प्रतियोगिताबाट बाहिरिएका थिए । त्यस्तै, न्युजिल्याण्डविरुद्धको पहिलो खेलमा फखर घाइते भएका थिए ।
च्याम्पियन्स ट्रफीमा पाकिस्तानले लिगको पहिलो खेलमा न्युजिल्यान्डसँग र दोस्रो खेलमा भारतसँग हार बेहोरेको थियो । बिहीबार बंगलादेशसँगको अन्तिम लिग खेल वर्षाका कारण रद्द भएको थियो ।
रिजवानले बिहीबार रावलपिण्डीमा बंगलादेशविरुद्धको खेल रद्द भएपछि प्रसारकलाई दिएको अन्तर्वार्तामा भनेका छन्, ‘हामी सबै धेरै निराश छौं । हामीबाट देशवासीले अपेक्षा गरेका थिए । हामीले राम्रो प्रदर्शन गर्न सकेनौं भन्ने स्वीकार गर्छौं । आशा छ हामी अझै कडा परिश्रम गर्नेछौं र फर्कनेछौं ।’
उनले साइम अयुब र फखर जमानको अनुपस्थितिले टोलीको सन्तुलन बिग्रिएको बताए । उनले भने, ‘दुवै खेलाडीले पछिल्लो केही महिनादेखि अस्ट्रेलिया, दक्षिण अफ्रिका र जिम्बाब्वेमा राम्रो प्रदर्शन गरिरहेका थिए । टोली सन्तुलित थियो। एक्कासी दुवै जना घाइते भए, जसका कारण टोलीलाई समस्या पर्यो ।’
यस्तै, रिजवानले घरेलु प्रतियोगितामा राम्रो ब्याकअपको तयारीका लागि सुधार गर्नुपर्ने बताए ।
