काठमाडौं । नेकपा एमालेनिकट विद्यार्थी संगठन अनेरास्ववियुले त्रिभुवन विश्वविद्यालय केन्द्रीय क्याम्पसको स्ववियु सभापतिमा सिद्धान्त भट्टलाई उम्मेदवार बनाउने भएको छ ।
हाल विश्वविद्यालय क्याम्पसको स्ववियु सचिव समेत रहेका भट्टलाई अनेरास्ववियु केन्द्रीय अध्यक्ष समिक बडालको उपस्थितिमा सभापति उम्मेदवारको घोषणा गरिएको प्रवक्ता प्रकाश पौडेलले जानकारी दिए ।
भट्टले विश्वविद्यालय सुधारका लागि विभिन्न रचनात्मक आन्दोलनको नेतृत्व गर्दै आईरहेका छन् । गत मंसिरमा उनले ३५ बुँदे माग राख्दै विश्वविद्यालयभित्र झाङ्गिँदै गएको विकृति विसङ्गति र बेतिथि अन्त्य गरी स्वच्छ शैक्षिक प्राज्ञिक वातावरण निर्माण गर्न र आउने पुस्तालाई अहिले विद्यार्थीले भोग्दै आएको समस्याबाट छुटकारा दिलाउन भन्दै सत्याग्रह समेत गरेका थिए ।
स्ववियुको चुनाव आगामी ५ चैतमा हुँदैछ ।
