काठमाडौँ । १८ औं संस्करणको इन्डियन प्रिमियर लिग (आईपीएल)को खेलतालिका सार्वजनिक भएको छ ।
जसअनुसार उद्घाटन खेल डिफेन्डिङ च्याम्पियन कोलकाता नाइट राइडर्स (केकेआर) र रोयल च्यालेन्जर्स बैंगलोर (आरसीबी)बीच मार्च २२ मा कोलकातामा हुनेछ ।
यस पटक ६५ दिनमा ७४ खेल हुनेछन् । मे १८ सम्म लिग चरणका ७० खेल हुनेछन् जसमा १२ डबल हेडर अर्थात् एकै दिनमा १२ पटक २ खेल खेलिनेछ । फाइनल मे २५ मा कोलकातामा हुनेछ ।
आईपीएलमा प्रतियोगिताको उद्घाटन र फाइनल खेल डिफेन्डिङ च्याम्पियन टोलीको घरेलु मैदानमा हुने परम्परा रहेको छ । यसपटक पनि यी दुवै खेल कोलकाताको इडेन गार्डेन स्टेडियममा हुनेछन् ।
फाइनल मे २५ मा हुनेछ भने क्वालिफायर २ पनि मे २३ मा कोलकातामा हुनेछ ।
गत सिजनको उपविजेता टोली सनराइजर्स हैदरावादको घरेलु मैदान राजीव गान्धी स्टेडियममा पनि दुई प्लेअफ खेल हुनेछन् । यहाँ मे २० मा क्वालिफायर–१ र मे २१ मा एलिमिनेटर खेलाइनेछ ।
कोलकाताले यसअघिको फाइनलमा सनराइजर्स हैदरावादलाई हराएर उपाधि जितेको थियो । १७ औं सिजनको उपविजेता सनराइजर्स हैदरावादले पनि घरेलु मैदान उप्पलबाट आईपीएलको यात्रा सुरु गर्नेछ ।
उसले मार्च २३ मा राजस्थान रोयल्ससँग खेल्नेछ । गत सिजनको क्वालिफायर–२ मा पनि दुवै टोली भिडेका थिए । उक्त खेलमा हैदरावाद विजयी हुँदै फाइनलमा प्रवेश गरेको थियो ।
यसैबीच, आरसीबीले बिहीबार आफ्नो नयाँ कप्तानको बारेमा जानकारी गरायो । १८ औं सिजनमा मध्य प्रदेशका रजत पाटीदारले टोलीको कप्तानी गर्नेछन् । केकेआरले पनि नयाँ कप्तानको साथ प्रतियोगिता खेल्नेछ । अघिल्लो कप्तान श्रेयस अय्यरले यो सिजन पञ्जाब किंग्सबाट खेल्ने भएकाले केकेआरले नयाँ कप्तान छनोट गर्नुपर्नेछ ।
१० टोलीको घरेलु मैदानबाहेक गुवाहाटी र धर्मशालामा पनि खेल हुनेछन् । गुवाहाटी राजस्थान रोयल्स (आरआर)को दोस्रो घरेलु मैदान हो, टोलीले यहाँ २ खेल खेल्नेछ । टोलीले मार्च २६ मा कोलकाता र ३० मार्चमा चेन्नईसँग खेल्नेछ । धर्मशाला पंजाब किंग्सको दोस्रो घरेलु मैदान हो । टोलीले यहाँ ३ खेल खेल्नेछ ।
१० टोलीका बाँकी घरेलु मैदान अहमदाबाद, मुम्बई, चेन्नई, बैंगलोर, लखनऊ, मुल्लानपुर, दिल्ली, जयपुर, कोलकाता र हैदरावाद हुन् । सिजनका बाँकी खेलहरू यहाँ खेलाइनेछन् । प्रतियोगितामा १० टोलीबीच कुल ७४ खेल हुनेछन् ।
आईपीएल भारतको फ्रेन्चाइज क्रिकेट प्रतियोगिता हो । यो प्रत्येक वर्ष मार्च देखि मे सम्म टी–२० ढाँचामा खेलिन्छ । यो प्रतियोगिता २००८ मा ८ टोलीबीच सुरु भयो । फाइनलमा चेन्नईलाई हराउँदै राजस्थानले पहिलो सिजनको उपाधि जितेको थियो ।
२०२२ देखि १० टोलीहरूले सहभागिता जनाउन थाले । चेन्नई सुपर किंग्स र मुम्बई इन्डियन्सले सर्वाधिक ५–५ उपाधि जितेका छन् । कोलकाता ३ उपाधि जितेर प्रतियोगिताको तेस्रो सफल टोली हो । दिल्ली, बैंगलोर , पञ्जाब र लखनउले अहिलेसम्म एउटै पनि उपाधि जितेका छैनन् ।
