चितवन । राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध चितवनमा पनि मुद्दा दर्ता भएको छ ।
मंगलबार साहारा चितवन बहुउद्देश्यीय सहकारी संस्था ठगी प्रकरणमा चितवन जिल्ला अदालतमा रविसहित ३२ जनाविरुद्ध मुद्दा दर्ता भएको हो ।
प्रहरीको अनुसन्धान प्रतिवेदन र प्रमाणहरूको आधारमा सरकारी वकिल कार्यालयले सहकारी ठगीमा पहिले संलग्न १५ तथा पछि थप १७ जनालाई संगठित अपराध कसुरमा मुद्दा दर्ता गरिएको छ । उनीहरूविरुद्ध सरकारी वकिल कार्यालयले ३८ करोड ९ लाख रुपैयाँ बिगो दाबी गरेको छ ।
यसअघि रवि लामिछाने कास्कीको सूर्यदर्शन सहकारी, काठमाडौंको स्वर्णलक्ष्मी सहकारी र रुपन्देहीको सुप्रिम सहकारीको मुद्दामा धरौटी रकम बुझाएर छुटेका थिए । उनीविरुद्ध वीरगञ्जको सानो पाइला सहकारीको बचत अपचलनमा पनि अनुसन्धान भईरहेको छ ।
