काठमाडौं । त्रिभुवन अन्तर्राष्ट्रिय विमानस्थलबाट प्रहरीले अवैध सुनसहित एक महिलालाई पक्राउ गरेको छ ।
प्रहरीले सोमबार काठमाडौं महानगरपालिका–१५ कि ५८ वर्षीया मैयाँ तामाङ गुरुङलाई ९८ ग्राम सुनसहित पक्राउ गरेको हो ।
थाई एयरको उडानद्वारा बैङककबाट काठमाडौं आएकी तामाङको साथबाट प्रहरीले सुनको रिङ १६ थान, टुक्रा ५ थान, सिक्री १ थान, औंठी १ थान र बाला १ थान गरी करिब ९८ ग्राम सुन बरामद गरेको प्रहरीले जनाएको छ ।
उनलाई थप अनुसन्धानको लागि प्रहरी वृत्त गौशाला पठाइएको छ ।
