काठमाडौं । त्रिकोणात्मक टी ट्वान्टी सिरिजमा नेपालले लगातार तेस्रो हार व्यहोरेको छ । आईतबार कीर्तिपुरस्थित त्रिवि क्रिकेट मैदान भएको खेलमा नेदरल्याण्डसँग १५ रनले पराजित हुँदै नेपालले लगातार तेस्रो हार चाखेको हो ।
टस हारेर पहिले फिल्डिङ गरेको नेपाललाई नेदरल्यान्ड्सले जितको लागि १४१ रनको लक्ष्य दिएको थियो । जबाफि ब्याटिङ गरेको नेपालले २० ओभरमा ८ विकेट गुमाएर १२५ रन मात्र बनाउन सक्यो ।
नेपालका लागि कप्तान इन्दु बर्माले सर्वाधिक ३० रन बनाउदा सम्झना खड्काले २३ रन बनाइन् ।
नेदरल्याण्ड्सका आइरिस विलिङ, कारोलिन डे लाङ र हिथर सिगर्सले २/२ विकेट लिँदा इभा लिन्च र इसाबेल वोनिङले १/१ विकेट लिए ।
त्यसअघि टस जितेर पहिले ब्याटिङ गरेको नेदरल्याण्ड्सले २० ओभरमा ९ विकेट गुमाएर १४० रन बनाएको थियो । नेदरल्याण्ड्सका लागि कप्तान बाबेट डे लिडेले ४१, हिथर सिगर्सले २६ तथा फेबे मोल्कनबोर र रोबिन रिकेले समान २१ रन बनाए ।
नेपालका लागि सीता राना मगरले ५ विकेट लिइन् । मनिषा उपाध्यायले २ विकेट लिँदा कविता जोशी र इन्दु बर्माले १/१ विकेट लिए ।
