प्रयागराज । भारतको प्रयागराजको संगम तटमा भागदौड मच्चिँदा मानवीय क्षति भएको छ ।
दुर्घटनामा १४ जनाभन्दा बढीको मृत्यु भएको बताइएको छ । ५० भन्दा बढी श्रद्धालु घाइते भएका छन् । यद्यपि प्रशासनले मृत्यु वा घाइतेको संख्याबारे कुनै जानकारी दिएको छैन । मृतकको संख्या बढ्नसक्ने बताइएको छ ।
भागदौडपछि प्रशासनको आग्रहमा १३ वटै अखाडाले आज मौनी अमावस्याको अमृतस्नान रद्द गरेका थिए ।
११ बजेपछि अमृतमा स्नान गर्ने निर्णय गरिएको छ । प्रधानमन्त्री मोदीले उत्तर प्रदेशका मुख्यमन्त्री आदित्यनाथ योगीसँग ४ पटक फोन गरेर घटनाको जानकारी लिएका थिए ।
अहिले अधिकारीहरुले हेलिकप्टरबाट महाकुम्भको अनुगमन गरिरहेका छन् । दुर्घटनाबारे मुख्यमन्त्री योगीले भने– ‘स्थिति नियन्त्रणमा छ । कुनै पनि प्रकारको अफवाहमा ध्यान नदिनुहोस् ।’
दुर्घटनापछि ७० भन्दा बढी एम्बुलेन्स संगमस्थलमा पुगेका थिए । घाइते र मृतकलाई अस्पताल लगिएको छ ।
आज महाकुम्भमा मौनी अमावस्याको स्नान हुने भएकाले करिब ९ करोड भक्तजन नगरमा उपस्थित हुने अनुमान गरिएको छ । प्रशासनका अनुसार राति अबेरसम्म संगमसहित ४४ घाटमा आठदेखि १० करोड भक्तजनले स्नान गर्ने अपेक्षा गरिएको छ ।
मंगलबार साढे ५ करोडभन्दा बढी भक्तजनले संगममा स्नान गरेका थिए । पूरै सहरमा सुरक्षाका लागि ६० हजारभन्दा बढी सैनिक तैनाथ छन् ।
तस्बिरः एएफपी
