काठमाडौँ । काठमाडौं महानगरपालिकाले सार्वजनिक स्थानमा फोहोर फाले १५ हजार रुपैयाँसम्म जरिवाना तिराउने भएको छ ।
मंगलबार महानगरपालिकाले एक सूचना जारी गर्दै घर, कम्पाउण्ड तथा परिसरको फोहोरमैला सडक, फुटपाथ तथा अन्य सार्वजनिक स्थानमा फाल्ने, राख्ने वा थुपार्ने जस्ता कार्य गर्न प्रतिवन्ध लगाइएको जनाएको हो । शहर फोहोर तथा दुर्गन्धित हुँदा जनस्वास्थ्यमा समेत प्रतिकूल असर पर्ने हुँदा यस्ता कार्य नगर्न महानगरले अनुरोध गरेको छ ।
यस्ता कार्यहरू कहीँकतै कसैले गरेमा काठमाडौँ महानगरपालिका वातावरण तथा प्राकृतिक स्रोत संरक्षण ऐन, २०७७ को दफा ५२ (च) वमोजिम पाँच हजारदेखि पन्ध्र हजार रुपैयाँसम्म जरिवाना हुने सूचनामा भनिएको छ ।
