काठमाडौं । गृहमन्त्री रमेश लेखकले चार जिल्लाका प्रतिनिधिसभा सदस्यहरूलाई छलफलका लागि बोलाएका छन् ।
पाथीभरा क्षेत्रमा केबलकार निर्माणको विरोधमा भइरहेको आन्दोलनको विषयमा गृहमन्त्री लेखकले ताप्लेजुङ, पाँचथर, तेह्रथुम र इलामका सांसदहरुसँग छलफल गर्न लागेका हुन् ।
छलफलका लागि अपरान्ह ५ बजे गृहमन्त्रालय बोलाइएको इलाम २ का सांसद सुहाङ नेम्वाङले जानकारी दिए ।
माघ १२ गते शनिबार केबलकार निर्माणको विरोधमा उत्रिएका ‘नो केबलकार समूह’ र सुरक्षाकर्मीबीच झडप भएको थियो । सोक्रममा केही प्रदर्शनकारी घाईते भएका थिए ।
प्रहरीले दमन गरेको भन्दै पहिचान पक्षधरहरूको समूहले आज मेची राजमार्ग र तमोर करिडोर बन्द गरेका छन् । मुक्कुमलुङ संघर्ष समिति, केबलकार खारेजी संघर्ष समिति, किरात याक्थुम चुम्लुङलगायतका संघसंस्थाले आजदेखि अनिश्चितकालीन बन्द आह्वान गरेको छन् ।
