काठमाडौँ । इटालीका २३ वर्षीय यानिक सिन्नरले लगातार दोस्रो वर्ष अस्ट्रेलियन ओपनको उपाधि जितेका छन् ।
आइतबार मेलबर्नको रोड लिभर एरिनामा पुरुष सिंगल्सको फाइनल खेलिएको थियो । सिनरले जर्मनीका अलेक्जेन्डर ज्वेरेभलाई ३ सेटमा पराजित गर्दै उपाधि जितेका हुन् ।
योसँगै महिला युगलमा शीर्ष वरीयताकी टेलर टाउनसेन्ड र क्याट्रिन सिनियाकोभाको जोडीले उपाधि कब्जा गरिन् ।
यो २०१९ पछि पहिलो पटक अस्ट्रेलियन ओपनमा भएको थियो, जब विश्व नम्बर १ र विश्व नम्बर २ फाइनलमा आमनेसामने भएका थिए । त्यसबेला नम्बर १ नोभाक जोकोभिचले नम्बर २ राफेल नाडाललाई सोझो सेटमा पराजित गरेका थिए ।
यसैगरी नम्बर १ सिनरले नम्बर २ ज्वेरेभलाई ६–३, ७–६, (७–४), ६–३ ले हराए ।
२०२४ देखि, सिनरले ५ मध्ये ३ ग्रान्डस्लाम जितेका छन् । उनले गत वर्ष अस्ट्रेलिया ओपन र युएस ओपनको उपाधि जितेका थिए । यसपटक पनि उनले अस्ट्रेलियन ओपन जितेर वर्षको सुरुवात गरेका छन् ।
यस अवधिमा उनले ८० खेल जितेका छन् भने ६ खेलमा मात्रै हार बेहोरेका छन् । पछिल्लो २१ खेलमा उनले कुनै पनि खेल हारेका छैनन् ।
महिला युगलमा अमेरिकाकी टेलर टाउनसेन्ड र चेक गणतन्त्रकी क्याट्रिन सिनियाकोभाको शीर्ष वरीयताको जोडीले उपाधि जितेको छ । दुवैले विश्व नम्बर ३ ताइवानकी सिह सु–वेई र लाटभियाकी जेलेना ओस्टापेन्कोको जोडीलाई हराए । विश्व नम्बर एक जोडीले फाइनलमा ६–२, ६–७ (४–७), ६–३ को सोझो सेट जितेका थिए ।
