एजेन्सी । बलिउड अभिनेता सैफ अली खान ५ दिनपछि मंगलबार लीलावती अस्पतालबाट डिस्चार्ज भएका छन् । जनवरी १५ मा बिहान करिब २ः३० बजे उनीमाथि चक्कु प्रहार भएको थियो । सैफको घाँटी र मेरुदण्डमा गम्भीर चोट लागेको थियो ।
यसपछि सैफ अटोबाट लीलावती अस्पताल पुगे, जहाँ उनको शल्यक्रिया र उपचार भयो । सैफ अली खानलाई लीलावती अस्पतालबाट घर पुग्न करिब १५ मिनेट लाग्यो । यस क्रममा उनी सडकमा मानिसहरूलाई मुस्कुराउँदै अभिवादन गरेको देखिन्थे ।
घर पुगेपछि उनी आफैं कारबाट ओर्लेर भवनभित्र पसे । सैफले सेतो शर्ट, नीलो जिन्स र कालो चश्मा लगाएका थिए । उनको ढाडमा ब्यान्डेज देखिन्थ्यो ।
उनको घरबाहिर कडा सुरक्षा व्यवस्था गरिएको छ । सैफ अब उनीमाथि आक्रमण भएको सतगुरु शरण अपार्टमेन्टमा बस्ने छैनन् । उनी पहिले बस्दै आएको फर्च्यून हाइट्स अपार्टमेन्टमा गएका हुन् ।
उनको सामान हिजै राति सारिएको छ । सतगुरु अपार्टमेन्ट आउनुअघि सैफ आफ्नो परिवारसँग फर्च्युन हाइट्समा बस्थे, पछि उनले यसलाई अफिसमा परिणत गरे ।
