काठमाडौँ । जनकपुरधाममा जारी ‘जय ट्रफी मेन्स एलिट कप’ क्रिकेट प्रतियोगिताअन्तर्गत आइतबार भएको खेलमा मधेश प्रदेश आफ्नो पहिलो पारीमा १०२ रन बनाएर अलआउट भएको छ ।
मधेश प्रदेशको टोली बागमती प्रदेशविरुद्ध ३५.३ ओभरमा अलआउट भएको हो ।
दुई दिवसीय प्रतियोगितामा मधेश प्रदेशले टस जितेर पहिले ब्याटिङ गर्ने निर्णय लिएको थियो । प्रतिकुल मौसमका कारण निर्धारित समयभन्दा करिब दुई घण्टा ढिलो सुरु भएको खेलमा मधेश प्रदेशका कुनै पनि ब्याट्सम्यान लामो समयसम्म क्रिजमा टिक्न सकेनन् ।
कप्तान हरिशंकर साह चार रन बनाउँदै पेभेलियन फर्किए । अर्का ओपनर मयन यादवले २१ रन जोडे । उनले ३६ बलको सामना गर्दै एक छक्का र एक चौका प्रहार गरेका थिए ।
तेस्रो नम्बरका ब्याट्सम्यान निरज यादवले १२ रन बनाए । चौथो नम्बरमा क्रिज सम्हाल्न आएका साहिल पटेल ६ रनमै आउट भए । विकेटकिपर ब्याट्सम्यान हिमांशु दत्तले पनि १० रनभन्दा बढी जोड्न सकेनन् ।
रुपेश सिंह ६ रन बनाउँदै पेभेलियन फर्किए । सातौँ नम्बरमा क्रिजमा आएका विशाल पटेलले टोलीको खातामा १६ रन थपे ।
यस्तै, अभिषेक तिवारीले ११ रन बनाए भने प्रदिप पासवान दुई रन बनाउँदै आउट भए । रञ्जित कुमार शून्य रनमै आउट भए । भुलावन साहनी दुई रनमा अविजित रहे । मधेश प्रदेशले अतिरिक्त रुपमा १२ रन पायो ।
बागमती प्रदेशका बलर सन्दीप लामिछाने एक्लैले पाँच विकेट लिए । टोलीका कप्तानसमेत रहेका सन्दीपले १४ ओभरमा दुई मेडन राख्दै ४१ रन खर्चिए । यस्तै, सूर्य तामाङले तीन विकेट हात पारे । उनले २.३ ओभरमा ७ रन खर्चिए । नन्दन यादव र प्रतिस जीसीले एक–एक विकेट लिए ।
जय ट्रफी आइतबारदेखि जनकपुरधाम र वीरगञ्जमा सुरु भएको हो । नेपाल क्रिकेट संघ (क्यान)ले आयोजना गरेको प्रतियोगितामा चार वटा टोलीको सहभागिता रहेको छ ।
प्रारम्भिक चरणको खेल दुई दिवसीय हुनेछ । फाइनल खेल भने तीन दिवसीय हुनेछ । जय ट्रफीका खेलहरू प्रत्येक दिन ९० ओभरको हुनेछ । प्रतियोगिताको प्रारम्भिक चरणमा प्रत्येक पाली ६०–६० ओभरको हुनेछ । ब्याटिङ गर्ने टोलीले पुरै ६० ओभर ब्याटिङ गर्न वा आफूले चाहेमा बिचमै पाली समाप्तिको घोषणा गर्न सक्नेछ ।
