काठमाडौँ । सिड्नी टेस्टमा भारतीय टोली अस्ट्रेलियासँग ६ विकेटले पराजित भएको छ । यो हारसँगै भारतीय टोली बोर्डर–गावस्कर ट्रफीमा ३–१ ले पराजित भयो ।
अष्ट्रेलियाले १० वर्षपछि यो सिरिजमा भारतलाई हराएको हो । यसअघि सन् २०१४-१५ सिजनमा एमएस धोनीको कप्तानीमा भारतबाट अष्ट्रेलियाले सिरिज खोसेको थियो ।
आइतबार खेलको तेस्रो दिन भारतले अस्ट्रेलियालाई १६२ रनको लक्ष्य दिएको थियो, जुन अष्ट्रेलियाले दोस्रो इनिङ्समा ४ विकेट गुमाएर पूरा गरेको थियो ।
ट्राभिस हेड ३४ र ब्यु वेबस्टर ३९ रनमा अविजित रहे । यी दुई बाहेक उस्मान ख्वाजाले ४१ र साम कन्स्टासले २२ रन बनाए । भारतका प्रसिद्ध कृष्णले ३ विकेट लिए । दिनको पहिलो सत्रमा भारतीय टोली दोस्रो इनिङ्समा १५७ रनमा अलआउट भएको थियो ।
यसअघि अस्ट्रेलिया पहिलो इनिङ्समा १८१ रनमा अलआउट भएको थियो भने भारतले पहिलो इनिङ्समा १८५ रन बनाएको थियो । यसरी भारतले पहिलो इनिङ्समा ४ रनको अग्रता लिएको थियो ।
भारत डब्लुटीसी फाइनलको दौडबाट बाहिर, अष्ट्रेलिया लगातार दोस्रो पटक फाइनलमा
यस पराजयपछि भारतीय टोली (५०.००%) विश्व टेस्ट च्याम्पियनसिपको वर्तमान चक्रमा फाइनलको दौडबाट बाहिरिएको छ भने अस्ट्रेलिया (६३.७३%) लगातार दोस्रो पटक फाइनलमा प्रवेश गरेको छ ।
अष्ट्रेलियाले अब विश्व टेस्ट च्याम्पियनसिपको फाइनलमा दक्षिण अफ्रिकासँग प्रतिस्पर्धा गर्ने छ ।
