काठमाडौँ । इंगिलस प्रिमियर लिग फुटबलमा म्यान्चेस्टर सिटीले जित निकालेको छ ।
गएराति भएको खेलमा सिटीले वेस्टहाम युनाइटेडलाई ४-१ गोलले हराएको हो । घरेलु टोलिलाई जित दिलाउन एर्लिङ हालाण्डले दुई तथा फिल फोडेनले एक गोल गरे । एक गोल भने सिटीले उपहारस्वरुप पाएको थियो ।
वेस्टहामका भ्लादिमिर कोउफलले आत्मघाती गोल गरेका हुन् । यस्तै, निकोलस फुल्कवर्गले वेस्टहामका लागि सान्त्वना गोल गरे । सिटी २० खेलबाट ३४ अंकका साथ तालिकाको छैटौं स्थानमा छ । वेस्टहाम २३ अंकका साथ १३ औं स्थानमा छ ।
गएराति नै भएको अर्को खेलमा चेल्सीले क्रिस्टल प्यालेससँग १-१ गोलको बराबरी खेल्दै अंक बाँड्यो । चेल्सीका कोल पाल्मेरले खेलको १४ औं मिनेटमा गोल गर्दै चेल्सीलाई सुरुवाती अग्रता दिलाएका थिए ।
८२ औं मिनेटमा जिन फिलिप्पे मटेटाले गोल गर्दै घरेलु टोलिलाई हारबाट जोगाए ।
बराबरीसँगै २० खेलबाट ३६ अंक जोडेको चेल्सी अंकतालिकाको चौंथो स्थानमा छ । प्यालेस २१ अंकका साथ १५ औं स्थानमा छ ।
