काठमाडौं । उपराष्ट्रपति रामसहाय प्रसाद यादवसंग चीनको राजनीतिक सल्लाहकार निकाय ‘चिनियाँ जनराजनीतिक परामर्शदात्री सम्मेलन’ ९सीपीपीसीसी० को राष्ट्रिय कमिटि सदस्य एवं चिनियाँ बुद्धिष्ट संघका उपाध्यक्ष तथा शनचन होङफा र नानसान मन्दिरका मठाधीस यिन शुनले शिष्टाचार भेटवार्ता गर्नुभएको छ ।
भेटमा नेपाल र चीनबीचको द्विपक्षीय सम्बन्ध, जनस्तरबीचको सम्बन्ध, द्विपक्षीय भ्रमण र सहयोग लगायतका विषयमा छलफल भएको उपराष्ट्रपति कार्यालयले जनाएको छ । उपराष्ट्रपति यादवले नेपाल र चीनबीच सदियौंदेखि रही आएको सौहार्दपूर्ण सम्बन्ध हालैका वर्षहरूमा अझ व्यापक र घनिष्ठ बन्दै गएको बताउनु भयो ।
‘सन् १९५५ मा स्थापित कूटनीतिक सम्बन्धले आगामी वर्ष सन् २०२५ मा ७० औं वर्ष पुरा गर्न लागेकोमा म अत्यन्तै हर्षित छु’ उहाँले भन्नुभयो, ‘हाम्रो मित्रवत् सम्बन्ध आपसी सद्भाव, मित्रता, पारस्परिक लाभमा आधारित छ ।’ उपराष्ट्रपति यादवले नेपाल र चीनबीच जनस्तरमा समेत अत्यन्त सुमधुर सम्बन्ध रहिआएको बताउनु भयो ।
‘चौथो शताब्दीदेखि नै हाम्रा दुई देशबीच सामाजिक, सांस्कृतिक सम्पर्क रहिआएको, चिनियाँ भिक्षुफा सियान र हु यान साङ तथा नेपाली भिक्षु बुद्धभद्र, राजकुमारी भृकुटी र कलाकार अरनिकोले हाम्रो जनस्तरको सांस्कृतिक सम्बन्धलाई समृद्ध बनाउन पुर्याएको योगदानलाई म स्मरण गर्न चाहन्छु’ उहाँले भन्नुभयो, ‘नेपाल–चीन सम्बन्धले दुवै देशका नागरिकहरूको विकास, समृद्धि र दिगो शान्ति प्राप्तिको साझा आकांक्षा पूरा गर्न महत्वपूर्ण आधारशीला प्रदान गरेको छ । ’
उपराष्ट्रपति यादवले मित्रराष्ट्र चीन नेपालको प्रमुख एवं लामो समयदेखिको विकास साझेदार रहिआएको बताउनु भयो । ‘पछिल्ला वर्षहरूमा नेपाल र चीनबीच संस्कृति, पर्यटन, नागरिक उड्डयन, शिक्षा, स्वास्थ्य, ऊर्जा, पूर्वाधार निर्माण, ‘कनेक्टिभिटी’, सूचना प्रविधिको विकास लगायत विकासका बहुआयामिक क्षेत्रहरूमा गहनरूपमा आपसी सहयोग एवं सहकार्य भैरहेकोमा म खुशी व्यक्त गर्न चाहन्छु’ उहाँले भन्नुभयो, ‘ नेपाल सन् २०२६ सम्म अल्पविकसित देशको श्रेणीबाट स्तरोन्नति हुन गइरहेको सन्दर्भमा चीनले नेपालको आर्थिक विकास र उन्नतिका लागि थप सहयोग विस्तार गर्नेछ भन्नेमा म विश्वस्त छु ।’
उपराष्ट्रपति यादवले नेपालले चीनसँगको सम्बन्धलाई उच्च महत्व दिँदै आएको र आगामी दिनमा पनि दुई देश र जनताको पारस्परिक हितका लागि निरन्तर सहकार्य हुँदै जानेमा विश्वास व्यक्त गर्दै महामहिम शुनको नेपाल भ्रमण सफल र बसाई सुखद रहोस् भन्ने कामना समेत गर्नुभयो ।
चिनियाँ जनराजनीतिक परामर्शदात्री सम्मेलन९सीपीपीसीसी० को राष्ट्रिय कमिटि सदस्य एवं चिनियाँ बुद्धिष्ट संघका उपाध्यक्ष तथा शनचन होङफा र नानसान मन्दिरका मठाधीस यिन शुनले प्रत्येक चिनियाँ भिक्षुहरु लुम्बिनीलाई आफ्नो ह्रदयमा राखेको उल्लेख गदै यो पवित्रभूमिप्रति मसहित सम्पूर्ण चिनियाँ नागरिकको ठूलो आस्था रहेको बताउनु भयो ।
‘प्रत्येक वर्ष ७० हजार चिनियाँ नागरिकले लुम्बिनी भ्रमण गर्दछन् । लुम्बिनी विश्वविद्यालयलाई चिनियाँ वेबसाइटमा समेत सूचिकृत गरिएको छ’ उहाँले भन्नुभयो, ‘चिनियाँ मन्दिर लुम्बिनी विश्वविद्यालयका विद्यार्थीहरुलाई चीनमा पढन जानका लागि व्यवस्थापन गर्दै आएको छ ।’ उहाँले नेपाल पवित्रभूमि विश्वका सम्पूर्ण बुद्धमार्गीहरुको मन र ह्रदयमामा रहेको समेत बताउनु भयो ।
