काठमाडौं । उपराष्ट्रपति रामसहाय प्रसाद यादव कतारको राष्ट्रिय दिवसका अवसरमा बुधबार साँझ होटल सोल्टीमा आयोजित स्वागत समारोहमा सहभागी हुनुभयो ।
नेपालका लागि कतारको दूतावासले कतारको राष्ट्रिय दिवसको अवसरमा बुधबार काठमाडौंमा आयोजना गरेको विशेष कार्यक्रम (रिसेप्सन) मा उपराष्ट्रपति यादव सरिक हुनुभएको हो ।
उक्त समारोहमा उपराष्ट्रपति यादवले नेपालका लागि कतारका राजदूत मिशाल एम अल अन्सारी मार्फत् कतारका जनतालाई हार्दिक बधाई तथा शुभकामना व्यक्त गर्नुभएको छ । राजदूत अन्सारीले कतार र नेपालको सम्बन्ध निकै सुमधुर रहेको स्मरण गर्दे नागरिक तहमा जोडिएको सम्बन्ध मजबुत रहेको बताउनु भयो ।
उक्त समारोहमा नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपाल, मन्त्रिपरिषद्का सदस्य संवैधानिक अङ्गका पदाधिकारी, यहाँस्थित कूटनीतिक नियोगका प्रमुख तथा पदाधिकारी, नेपाल सरकारका विशिष्ट श्रेणीका कर्मचारी, पूर्वसांसद, उद्योगपति, व्यापारी, खेलकुद क्षेत्रका पदाधिकारी, कलाकार एवं समाजका प्रतिष्ठित व्यक्तिहरुको उपस्थिति थियो ।
