काठमाडौं । कतार एयरवेजले दोहा–भैरहवा उडान स्थगन गरेको छ । दुईतर्फी यात्रुको माग नभएपछि एयरवेजले उडा नै स्थगित गरेको हो । यो एयरवेजले गत शनिबार भैरहवामा अन्तिम उडान गरेको थियो ।
दसैं, तिहार, छठ लगायतका चाडपर्व र शरदकालीन पर्यटकीय सिजन सकिएसँगै नेपालबाट फर्किनुपर्ने यात्रुको चापका आधारमा कतारले कात्तिक २७ गते दोहाबाट भैरहवा उडान गरेको थियो । दोहाबाट भैरहवा टचडाउन अनुमति लिई कतारले त्यहाँबाट काठमाडौं आई दोहा फर्किने उडान गरेको थियो । यो रुटमा १९ दिन कतारले दैनिक उडान गर्दा दुईतर्फी सय हाराहारी यात्रु आवागमन भएका थियो ।
नेपाल नागरिक उड्डयन प्राधिकरणले कतारले भैरहवामा उडान गर्नेबारे अनुमतिका लागि पत्राचार नगरेको जनाएको छ । पहिलोपटक दोहा–भैरहवाका लागि कतारले १२ नोभेम्बरदेखि ३० नोभेम्बरसम्मको उडान अनुमति लिएको थियो ।
कतारले भैरहवामा खटाइएका कर्मचारी पनि त्यहाँबाट काठमाडौं फिर्ता बोलाइसकेको छ ।
पर्यटकीय सिजनमा दैनिक दोहा–काठमाडौं चारवटा उडान गर्ने कतारले यतिबेला काठमाडौंमा दुइटा उडानमात्रै गरिरहेको छ ।
यसैबीच यात्रुको चाप नभएका कारण थाइल्यान्डबाट आउने थाई एयर एशियाले पनि भैरहवाको उडान संख्या कटौती गरेको छ । सोम र बिहीबार बैंकक–भैरहवा उडान गरिरहेको थाई एयर एशियाले सोमबारको उडानलाई बिहीबारसँग मर्ज गरेको छ ।
भैरहवामा शनिबारसम्म कतारबाहेक थाई एयर एशिया, फ्लाई दुबई, जजीरा र नेपाल वायुसेवा निगमले अन्तर्राष्ट्रिय उडान गरिरहेका थिए । शनिबारपछि भैरहवामा अन्तर्राष्ट्रिय उडान गर्ने वायुसेवाको संख्या चारमा झरेको छ ।
