काठमाडौँ । नेपाल प्रिमियर लिग (एनपिएल)अन्तर्गत पोखरा एभेञ्जर्स पहिलो खेलमै पराजित भएको छ । भर्खरै सम्पन्न खेलमा चितवन राइनोजसँग ८७ रनले पराजित हुँदै प्रतियोगितामा पोखराले खराब सुरुवात गरेको हो ।
१६२ रनको लक्ष्य पछ्याएको पोखरा १३.२ ओभरमै ७४ रनमा अलआउट भयो । नारायण जोशीले ३० तथा मार्कुस क्रीचलीले १७ रनबाहेक अन्य खेलाडीले दोहोरो अंकमा रन बनाउन सकेनन् ।
बलिङतर्फ चितवनका शोहेल तनभिर, रिजन ढकाल र लुक मार्टिन बेनकेन्स्टाइनले ३–३ विकेट लिए । यस्तै, एक विकेट दीपक बोहराको नाममा रह्यो ।
त्यसअघि टस हारेर पहिले ब्याटिङ गरेको चितवनले २० ओभरमा ७ विकेटको क्षतिमा १६१ रन जोड्यो ।
उसका लागि रवि वोपाराले अर्धशतकीय पारी खेले । उनले ३८ बलमा ५१ रन जोडे । यस्तै, कुशल मल्लले २३ बलमा ३८ रन जोडे भने लुक मार्टिन बेनकेन्स्टाइनले १६, हसन इसाखिलले १४ रन जोडे । अमर रौतेला १३ र शरद भेषवाकर ११ रनमा अविजित रहे ।
बलिङतर्फ पोखराका विपिन खत्री, बास डि लिडे र रेमन राइफरले २–२ विकेट लिए भने सागर ढकालले १ विकेट लिए । सोमबार काठमाडौँ गोर्खाजलाई पाँच विकेटले पराजित गरेको चितवन राइनोजले लगातार दोस्रो जित निकालेको छ ।
