काठमाडौँ । कालीमाटीस्थित सडकमा मृत भेटिएकी महिलाको पोस्टमार्टम रिपोर्ट आएको छ ।
मङ्सिर ७ मा उदयपुर घर भएकी ४५ वर्षीया जानुका सुर्खेतीको शव कालीमाटीको सङ्गीत मार्गमा फेला परेको थियो । बझाङ घर भएका २२ वर्षीय कवीन्द्र बोहराले मध्यराति सुर्खेतीको शव बोकेर हिडेको भिडियो सीसीटिभी क्यामेरामा देखिएको थियो ।
बोहराले महिलाको शव काँधमा बोकेर सडकमा फालेका थिए । उनलाई प्रहरी वृत्त कालीमाटीले अदालतबाट म्याद लिएर हिरासतमा राखेको छ ।
त्रिवि शिक्षण अस्पतालका फरेन्सिक चिकित्सकले गरेको शव परीक्षण रिपोर्टअनुसार सुर्खेतीको मृत्यु लिभरको समस्याका कारण भएको देखिएको छ । पोस्टमार्टम रिपोर्टमा ‘डिजिज अफ द लिभर’ का कारण उनको मृत्यु भएको लेखिएको अनुसन्धानमा संलग्न एक जना अधिकृतले बताए ।
सुर्खेतीको हत्यामा संलग्न आशंकामा पक्राउ परेका कवीन्द्र बोहरा लागुऔषध सेवनकर्ता समेत हुन् । उनी यसअघि पनि चोरी डाँका,अभद्र व्यवहार सम्बन्धीलगायत कसुरमा १० पटक पक्राउ परिसकेका थिए । उनले सुर्खेतीको शव बोकेको स्वीकार गरे पनि हत्या अस्वीकार गरेका छन् ।
घटनाबारे अनुसन्धान भईरहेको उपत्यका अपराध अनुसन्धान कार्यालयका एसपी काजीकुमार आचार्यले जानकारी दिए ।
