एजेन्सी । मुम्बई इन्डियन्सले अफगानिस्तानका युवा बलर अल्लाह गजानफरलाई ४.८० करोडमा टोलिमा भित्र्याएको छ ।
लिलामीका क्रममा कोलकाता नाइट राइडर्स (केकेआर) र रोयल च्यालेन्जर्स बैंग्लोर (आरसीबी)ले पनि मिस्ट्री बलरलाई बोली लगाए, तर मुम्बईले उनलाई आफ्नो टोलीको हिस्सा बनायो ।
पछिल्लो संस्करणमा, १८ वर्षीय बलर कोलकाता नाइट राइडर्स (केकेआर)को हिस्सा थिए, तर खेल्ने मौका पाएनन् । अब उनी हार्दिक पाण्ड्याको कप्तानीमा खेल्दैछन् । स्टार अलराउन्डरले उनलाई प्लेइङ ११ मा मौका दिने अपेक्षा गरिएको छ । कर्ण शर्मापछि उनी दोस्रो स्पिनर हुन् जसलाई मुम्बई इन्डियन्सले आधार मूल्यभन्दा बढीमा किनेको छ ।
गजानफर यसअघि आईपीएल २०२३ को लिलामीमा पनि चर्चामा आएका थिए । उनी १५ वर्ष १६१ दिनको उमेरमा दर्ता भएका थिए । तर, त्यतिबेला उनी बिक्रीमा परेका थिएनन् । २०२४ मा मुजीब–उर रहमानको सट्टामा कोलकाता नाइट राइडर्समा आबद्ध हुँदा उनको भाग्य परिवर्तन भयो ।
यसबाहेक गत सिजनअघि मुम्बई इन्डियन्स (एमआई) ले उनलाई नेट बलरका रूपमा अनुबन्ध गरेको थियो तर भिसाका कारण उनी आउन सकेनन् । हालै शारजाहमा बंगलादेशविरुद्धको खेलमा उनले २६ रन दिएर ६ विकेट लिएका थिए ।
उनको स्पेलले बंगलादेशले ११ रनमा ७ विकेट गुमाएको थियो । गजानफरले नयाँ कीर्तिमान बनाएका थिए । गजानफरले इमर्जिङ एसिया कप २०२४ मा पनि उत्कृष्ट प्रदर्शन गरेका थिए ।
यी दायाँ हाते बलरले अफगानिस्तानका लागि टी–२० अन्तर्राष्ट्रिय क्रिकेटमा डेब्यु गरेका छैनन् । उनले ८ ओडिआई खेलमा १२ विकेट लिएका छन् ।
