काठमाडौं । कार्तिक ११ मा काठमाडौँको लाजिम्पाटस्थित पानीपोखरीमा घरजग्गा व्यवसायी ३५ वर्षीय विक्रम लामामाथि आक्रमण भएको थियो । आपराधिक पृष्ठभूमिका व्यक्तिहरु प्रयोग गरेर उनीमाथि रड प्रहार गरिएको प्रहरीले निष्कर्ष निकालेको छ ।
नुवाकोटको ककनी गाउँपालिका–६ घर भएर टोखा नगरपालिका–३ स्थित ग्राण्डी बस्ने लामामाथि चार जनाको समूहले मार्ने उद्देश्यसहित आक्रमण गरेको थियो । आक्रमण गर्ने समूहका ‘मार्शल’ भनिने शैलेन्द्र तामाङलाई प्रहरीले पक्राउ गरेर ज्यान मार्ने उद्योगको कसुरमा अनुसन्धान गरिरहेको छ ।
आक्रमणमा तामाङका साथै अजय लामा, निश्चल सुनार र दीपक बरामु संलग्न रहेका जिल्ला प्रहरी परिसर काठमाडौंले जनाएको छ । यी तिनै जना भने अहिलेसम्म फरार छन् । अजय लामाले आक्रमण गर्न भनेपछि आफूले आक्रमण गरेको शैलेन्द्र तामाङले प्रहरी समक्ष बताएका छन् ।
हिरासतमा रहेका तामाङ र अजय लामा यसअघि पनि ज्यान मार्ने उद्योगको कसुरमा पक्राउ परेका घटनाको अनुसन्धान गरिरहेका एक प्रहरी अधिकृतले बताए । आक्रमण गर्नेहरुको पृष्ठभूमि पनि आपराधिक भएकाले योजनाबद्ध रुपमा कोहीमार्फत परिचालन भएको हुनसक्ने उनले बताए । यद्यपी, प्रहरीले आक्रमणको एकिन कारण भने अहिलेसम्म खुलाउन सकेको छैन ।
